കൊച്ചി∙ നടിയെ ആക്രമിച്ച കേസിൽ വിചാരണക്കോടതി പുറപ്പെടുവിച്ച വിധിക്കെതിരെ അപ്പീൽ സമർപ്പിക്കാൻ സർക്കാർ തീരുമാനിച്ചതായി നിയമമന്ത്രി പി. രാജീവ് അറിയിച്ചു. ‘‘മുഖ്യമന്ത്രിയുമായി സംസാരിച്ചു. വിധി പഠിച്ചതിന് ശേഷം അപ്പീലിന് പോകണമെന്നാണ് അദ്ദേഹത്തിന്റെ നിർദേശം. സർക്കാർ എപ്പോഴും അതിജീവിതയ്ക്ക് പൂർണ പിന്തുണയോടെ നിൽക്കുകയാണ്. അവർക്കു പൂർണനീതി ലഭിക്കണം എന്നതാണ് സർക്കാരിന്റെ നിലപാട്’’ – അദ്ദേഹം പറഞ്ഞു.
പ്രതികളുടെ ജാമ്യഹർജിക്കെതിരെ സുപ്രീംകോടതിയുള്പ്പെടെ വിവിധ നിലകളിൽ പ്രമുഖ അഭിഭാഷകരെ പ്രോസിക്യൂഷൻ രംഗത്തിറക്കിയിരുന്നുവെന്നും, ഇപ്പോൾ വന്നിരിക്കുന്നത് വ്യത്യസ്തമായ വിധിയാണെന്നും മന്ത്രി ചൂണ്ടിക്കാട്ടി. ‘‘കുറ്റം തെളിഞ്ഞിട്ടുള്ള കേസാണ് ഇത്. ഗൂഢാലോചന സംബന്ധിച്ച കാര്യങ്ങളിൽ വ്യക്തത ലഭിക്കാൻ വിധിയുടെ പകർപ്പ് ലഭിക്കേണ്ടതുണ്ട്. 1512 പേജുള്ള ആർഗ്യൂമെന്റ് നോട്ടിലാണ് പ്രോസിക്യൂഷൻ കോടതിയിൽ വിശദമായ തെളിവുകൾ സമർപ്പിച്ചിരുന്നത്. അതിനനുസരിച്ചായല്ല ഇപ്പോഴത്തെ വിധി വന്നിരിക്കുന്നത്’’ – അദ്ദേഹം വ്യക്തമാക്കി.
‘‘ഡിജിപിയുമായും സംസാരിച്ചു. വിധി വിശദമായി പഠിച്ച് അപ്പീൽ സമർപ്പിക്കുന്നതിനുള്ള പ്രാരംഭ നടപടി ആരംഭിക്കാൻ പ്രോസിക്യൂഷനെ നിർദേശിച്ചിട്ടുണ്ട്. അന്വേഷണം പഴുതടച്ച രീതിയിൽ, അന്വേഷണക്കാർക്ക് പൂർണ സ്വാതന്ത്ര്യത്തോടെ നടത്തിയതായിരുന്നു. അതിജീവിതയ്ക്ക് പൂർണനീതിയാകുന്നത് ഉറപ്പാക്കുന്നതിൽ സർക്കാർ പ്രതിബദ്ധമാണ്’’ – പി. രാജീവ് പറഞ്ഞു.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
