കോഴിക്കോട്: ഇനി വ്രത ശുദ്ധിയുടെ നാളുകള്‍. വിശ്വാസികള്‍ കാത്തിരുന്ന വിശുദ്ധിയുടെ ദിനരാത്രങ്ങള്‍ സമാഗതമായി. ഇന്ന് സുബഹ് ബാങ്കിന് മുമ്ബ് അത്താഴം കഴിച്ച്‌ ഇസ്ലാം മത വിശ്വാസികള്‍ പുണ്യമാസത്തിലെ വ്രതാനുഷ്ഠാനത്തിലേക്ക് കടന്നു.
ഇനി പ്രാർഥനയുടെയും ആരാധനയുടെയും സജീവമായ മുപ്പത് നാളുകള്‍. മനസും ശരീരവും പാകപ്പെടുത്തി ആത്മ നിയന്ത്രണത്തിൻറെ വ്രതമാണ് റമദാൻ മാസത്തില്‍ വിശ്വാസി അനുഷ്ഠിക്കുന്നത്. ഇനിയുള്ള മുപ്പത് നാളുകള്‍ സഹനത്തിൻറെയും സഹാനുഭൂതിയുടേയും പുണ്യ ദിനങ്ങളാണ് ഇസ്ലാം മത വിശ്വാസികള്‍ക്ക്.
ഇന്ന് മുതല്‍ പകലില്‍ അന്നപാനീയങ്ങള്‍ ഉപേക്ഷിച്ച്‌ അല്ലാഹുവിലേക്ക് മനസ്സ് തിരിച്ച്‌ ജീവിതത്തെ പ്രാർഥനാഭരിതമാക്കും. പോയ പതിനൊന്ന് മാസങ്ങളേക്കാള്‍ സജീവതയോടെ പള്ളികളില്‍ ഒത്തുചേരും. രാത്രിയിലെ സവിശേഷമായ തറാവീഹ് നിസ്‌കാരമുള്‍പ്പെടെ നിർവഹിച്ച്‌ ആത്മീയ സായൂജ്യം കരഗതമാക്കാൻ മനസ്സിനെയും ശരീരത്തെയും പാകപ്പെടുത്തിയാണ് വിശ്വാസികള്‍ റമസാനെ വരവേല്‍ക്കുന്നത്.
പാപങ്ങളില്‍ നിന്ന് മുക്തി നേടി പുതിയ മനുഷ്യനാകാൻ വിശ്വാസിയെ പാകപ്പെടുത്തുന്ന മാസം കൂടിയാണിത്. സഹജീവികളുടെ വേദനകള്‍ക്കൊപ്പം നില്‍ക്കാനും ആശ്വാസമരുളാനും മറ്റു മാസങ്ങളേക്കാള്‍ സമയം കണ്ടെത്തുന്നു ലോകത്താകമാനമുള്ള മുസ്‌ലിംകള്‍. ഈ ദിവസങ്ങളില്‍ ചാരിറ്റി പ്രവർത്തനങ്ങളിലേക്ക് മുസ്‌ലിം സംഘടനകള്‍ കൂടുതല്‍ ശ്രദ്ധചെലുത്തുകയും വിവിധ പദ്ധതികള്‍ ആവിഷ്‌കരിച്ചു നടപ്പാക്കുകയും ചെയ്യാറുണ്ട്.
പള്ളികളിലും സ്ഥാപനങ്ങളിലും വിപുലമായ ഇഫ്ത്വാർ സംഗമങ്ങള്‍ സംഘടിപ്പിക്കുന്നതിന് കേരള മുസ്‌ലിം ജമാഅത്തിന്റെ കീഴില്‍ പദ്ധതി ആവിഷ്കരിച്ചിട്ടുണ്ട്. യാത്രക്കാർക്ക് സഹായകമാകുന്ന വിധത്തില്‍ എസ് വൈ എസിന്റെ നേതൃത്വത്തില്‍ ദേശീയപാതകളോട് ചേർന്നും ബസ് സ്റ്റാൻഡ്, റെയില്‍വേ സ്റ്റേഷൻ ഉള്‍പ്പെടെ സ്ഥലങ്ങളിലും ഇഫ്ത്വാർ ഖൈമകള്‍ സജ്ജീകരിക്കുന്നുണ്ട്.
വിശുദ്ധ ഖുർആൻ അവതീർണമായ മാസമാണ് റമസാൻ. പള്ളികളിലും വീടുകളിലും ഖുർആൻ പാരായണത്തിനായി വിശ്വാസികള്‍ കൂടുതല്‍ സമയം ചെലവഴിക്കും. സംഘടനാ കമ്മിറ്റികളുടെയും മഹല്ല് കമ്മിറ്റികളുടെയും ആഭിമുഖ്യത്തില്‍ ഖുർആൻ പ്രഭാഷണങ്ങളും പഠന ക്ലാസ്സുകളും നടക്കും. അസാന്മാർഗിക പ്രവർത്തനങ്ങളില്‍ നിന്ന് പൂർണമായും വിട്ടുനിന്നുകൊണ്ടുള്ള ജീവിതം തുടർന്നും നയിക്കാനുള്ള പരിശീലനകാലം കൂടിയായാണ് വിശ്വാസികള്‍ റമസാനിനെ കാണുന്നത്.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
