ശരീരത്തിന്റെ ആരോഗ്യകരമായ പ്രവർത്തനത്തിന് പ്രധാനപ്പെട്ട പോഷകങ്ങളിൽ ഒന്നാണ് പ്രോട്ടീൻ. പലപ്പോഴും ഭക്ഷണശീലത്തിലെ പാളിച്ചകൾ കൊണ്ട് ഒരു വ്യക്തിക്ക് ദിവസവും ആവശ്യമായ പ്രോട്ടീൻ ലഭിക്കാറില്ല. ഇത് മസ്തിഷ്കം ഉൾപ്പടെയുള്ള ശരീരത്തിൻറെ പ്രവർത്തനങ്ങളെ ബാധിക്കും. ശരീരത്തിൽ ആവശ്യത്തിന് പ്രോട്ടീൻ കിട്ടുന്നില്ല എന്നതിന്റെ ചില പ്രധാനപ്പെട്ട ലക്ഷണങ്ങൾനോക്കാം
പ്രോട്ടീൻ്റെ കുറവ് ചർമ്മത്തിലും മുടിയിലും നഖങ്ങളിലും പ്രകടമാകാം. ഇവയെല്ലാം പ്രധാനമായും പ്രോട്ടീൻ കൊണ്ട് നിർമ്മിച്ചതാണ്. ചർമ്മത്തിൽ ചുവപ്പ് പാട് കാണുക, പൊട്ടുന്ന നഖങ്ങൾ, മുടികൊഴിച്ചിൽ എന്നിവയെല്ലാം പ്രോട്ടീന്റെ കുറവ് മൂലം ഉണ്ടാകുന്നതാകാം. എല്ലുകളുടെ ശക്തിയും സാന്ദ്രതയും നിലനിർത്താൻ പ്രോട്ടീൻ സഹായിക്കുന്നു. ആവശ്യത്തിന് പ്രോട്ടീൻ അടങ്ങിയിട്ടില്ലാത്തത് എല്ലുകളെ ദുർബലപ്പെടുത്തുകയും ഒടിവുകൾ ഉണ്ടാകാനുള്ള സാധ്യത വർദ്ധിപ്പിക്കുകയും ചെയ്യും.
കുറഞ്ഞ അളവിൽ പ്രോട്ടീൻ ശരീരത്തിലെത്തുന്നത് കലോറി ഉപഭോഗം വർദ്ധിപ്പിക്കുന്നതിന് കാരണമാകുന്നു. അത് കൊണ്ട് തന്നെ വിശപ്പ് കൂട്ടുന്നതിന് കാരണമാകും. പ്രോട്ടീൻ്റെ കുറവിൻ്റെ മറ്റൊരു സാധാരണ ലക്ഷണം ഫാറ്റി ലിവർ അല്ലെങ്കിൽ കരൾ കോശങ്ങളിൽ കൊഴുപ്പ് അടിഞ്ഞുകൂടുന്നതാണ്.
കുറഞ്ഞ പ്രോട്ടീൻ ഉപഭോഗം മാനസികാവസ്ഥയിൽ ഏറ്റക്കുറച്ചിലുകൾക്ക് കാരണമാകും. വിഷാദം, ഉത്കണ്ഠ എന്നിവയ്ക്ക് ഇടയാക്കും. എട്ട് മണിക്കൂർ ഉറങ്ങുന്ന ആളാണെങ്കിൽ പോലും വളരെയധികം ക്ഷീണം അനുഭവപ്പെടുന്നത് പ്രോട്ടീൻ കുറവിന്റെ ലക്ഷണമാണെന്ന് വിദഗ്ധർ പറയുന്നു.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
