2022 ലോകകപ്പ് ക്വാർട്ടർ ഫൈനലിൽ മൊറോക്കോയോട് അതി ദയനീയമായ പരാജയപ്പെട്ട് പോർച്ചുഗൽ പുറത്തായതോടെ ക്രിസ്റ്റ്യാനോ റൊണാൾഡോ എല്ലാ പ്രതീക്ഷകളും തകർന്ന്, നിറഞ്ഞ മിഴികളുമായാണ് ഖത്തറിലെ ഫുട്ബോൾ മൈതാനത്തുനിന്ന് നടന്നകന്നത്. പോർച്ചുഗൽ ജെഴ്സിയിൽ അയാളെ ഇനി കാണാനാവില്ലെന്ന്, അന്താരാഷ്‌ട്ര മത്സരങ്ങളിൽ നിന്ന് അയാൾ വിരമിക്കുന്നുവെന്ന്, പലരും ഉറപ്പിച്ച നിമിഷം. പക്ഷേ, അതു വരെയുള്ള എല്ലാ കുറ്റപ്പെടുത്തലുകളെയും നിഷ്പ്രഭമാക്കി അയാളൊരു ഫീനിക്സ് പക്ഷിയെ പോലെ ഉയിർത്തെഴുന്നേറ്റു. മുൻവിധികളെല്ലാം തകർത്ത് റൊണാൾഡോ ആറാം തവണയും യൂറോകപ്പിലേക്ക് ചുവടുവെക്കുന്നു.
ജയിച്ചാലും തോറ്റാലും ക്രിസ്റ്റ്യാനോ റൊണാൾഡോയുടെ അവസാന യൂറോ കപ്പായിരിക്കും ഇത് .അതു കൊണ്ടു തന്നെ 2016 ആവർത്തിക്കുമെന്ന പ്രതീക്ഷയിൽ ജർമനിയിലെ മൈതാനത്തിലേക്ക് കണ്ണും കാതും കൂർപ്പിക്കുന്നു ആരാധകർ . ലോകകപ്പ് ടൂർണമെന്‍റിനു ശേഷം പോർച്ചുഗൽ ടീമിന്‍റെ കോച്ചായെത്തിയ റോബർട്ടോ മാർട്ടിനസും റൊണാൾഡോയെ അവിശ്വസിക്കുന്നില്ല. ലോകകപ്പിലെ സബ്സ്റ്റിറ്റ്യൂട്ട് ബെഞ്ച് ഉപേക്ഷിച്ച്, യൂറോ കപ്പിന്‍റെ യോഗ്യതാ മത്സരങ്ങളിൽ പത്തിൽ ഒമ്പതിലും റൊണാൾഡോ മൈതാനത്തിറങ്ങി. 10 ഗോളുകൾ വാരിക്കൂട്ടി. നിലവിൽ ബെൽജിയത്തിന്‍റെ റൊമേലു ലുകാകു (14 ഗോൾ ) മാത്രമാണ് യോഗ്യതാ റൗണ്ട് ഗോളുകളിൽ റൊണാൾഡോയ്ക്കു മുന്നിലുള്ളത്.
2004ൽ ആദ്യമായി യൂറോ കപ്പിനു വേണ്ടി പൊരുതുമ്പോൾ ഫുട്ബോൾ ആരാധകർക്കിടയിൽ പുതുമുഖമായിരുന്നു ക്രിസ്റ്റ്യാനോ റൊണാൾഡോ എന്ന പത്തൊമ്പതുകാരൻ. രണ്ട് ഗോളുകളും രണ്ട് അസിസ്റ്റുകളുമായി ഗ്യാലറികൾ പിടിച്ചെടുക്കാൻ ആ കൗമാരക്കാരന് അധികം മത്സരങ്ങളൊന്നും വേണ്ടിവന്നില്ല. സ്വന്തം നാട്ടിൽ നടന്ന ടൂർണമെന്‍റിൽ പോർച്ചുഗൽ ഫൈനലിൽ പ്രവേശിച്ചു. പക്ഷേ, ഫൈനലിൽ കപ്പ് സ്വന്തമാക്കിയത് ഗ്രീസ്. നെതർലൻഡ്സിനെതിരേ ലിസ്ബണിൽ നടന്ന സെമി ഫൈനൽ മത്സരത്തിൽ റൊണാൾഡോ നേടിയ ഗോൾ ശ്രദ്ധേയമായി. 2-1 എന്ന സ്കോറിനാണ് അന്ന് ഡച്ച് ടീം പരാജയപ്പെട്ടത്.
നാലു വർഷങ്ങൾക്കു ശേഷം 2008ലെ യൂറോ കപ്പ് ആരംഭിക്കുമ്പോഴേക്കും ഗോൾ മെഷീൻ എന്ന നിലയിൽ റൊണാൾഡോ വളർന്നു കഴിഞ്ഞിരുന്നു. അപകടകാരിയായ വിങ്ങർ എന്ന് ഫുട്ബോൾ നിരീക്ഷകർ റൊണാൾഡോയെ കുറിച്ചിട്ടു. പക്ഷേ, നിർഭാഗ്യവശാൽ ആ ടൂർണമെന്‍റിൽ ഒരൊറ്റ ഗോളിലും മൂന്ന് അസിസ്റ്റുകളിലും റൊണാൾഡോയുടെ പ്രഭാവം ഒതുങ്ങി. പിന്നീട് പതിനാറാം റൗണ്ടിൽ ജർമനി പോർച്ചുഗലിനെ നോക്ക് ഔട്ട് ചെയ്തു. പക്ഷേ, 2012 റൊണാൾഡോ ആ കുറവുകൾ നികത്തി . ടീമിനെ ഒറ്റയ്ക്ക് നയിച്ച് സെമി ഫൈനൽ വരെ എത്തിച്ചത് പലപ്പോഴും റൊണാൾഡോയുടെ ഒറ്റയാൾ പോരാട്ടങ്ങളായിരുന്നു. പക്ഷേ, സെമിയിൽ സ്പെയിനോട് പെനൽറ്റിയിൽ തോറ്റുമടങ്ങി.
പോർച്ചുഗൽ ആരാധകർ ഒരിക്കലും മറക്കാത്ത യൂറോ കപ്പ് വർഷമായിരുന്നു 2016. പോർച്ചുഗൽ കപ്പുയർത്തിയ വർഷം. റൊണാൾഡോ ഉതിർത്ത മൂന്നു ഗോളുകളും രണ്ട് അസിസ്റ്റുകളുമാണ് അന്ന് പോർച്ചുഗലിനെ താങ്ങി നിർത്തിയത്. 2020 ആണ് യൂറോയിൽ റൊണാൾഡോ ഏറ്റവും മിന്നിത്തിളങ്ങിയത്. അഞ്ച് ഗോളും ഒരു അസിസ്റ്റുമായി റൊണാൾഡോ മൈതാനത്തിനുമപ്പുറം വളർന്നു. പക്ഷേ, യൂറോ കിരീടം മാത്രം അകന്നുനിന്നു. ഇത്തവണത്തെ യൂറോ കപ്പിൽ കൂടി കളിക്കുന്നതോടെ, അഞ്ച് തവണ യൂറോ കപ്പ് കളിച്ച സ്പാനിഷ് ഇതിഹാസം ഇകർ കസിയസിന്‍റെ റെക്കോഡ് കൂടി റൊണാൾഡോ തകർക്കും. ജൂൺ 18ന് ചെക്ക് റിപ്പബ്ലിക്കിനെതിരേയാണ് ഇത്തവണ പോർച്ചുഗലിന്‍റെ ആദ്യമത്സരം.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
