കൊച്ചി: എൽപിജി സിലിണ്ടർ ഉപഭോക്താവിന് നേരിട്ട് വീട്ടിൽ എത്തിച്ചു നൽകുന്ന ഹോം ഡെലിവറി സംവിധാനത്തിൽ മാറ്റങ്ങൾ വരുന്നു. നവംബർ ഒന്ന് മുതൽ എൽപിജി സിലിണ്ടറുകൾ ഒറ്റത്തവണ പാസ്‌വേഡ് (ഒടിപി) അടിസ്ഥാനമാക്കിയായിരിക്കും വിതരണം ചെയ്യുക. അതായത് ഗ്യാസ് സിലിണ്ടർ ബുക്ക് ചെയ്യുന്ന ഉപയോക്താക്കൾക്ക് ഒടിപി നിർബന്ധമാണ്. ഇത് ഉണ്ടെങ്കിൽ മാത്രമേ ഗ്യാസ് സിലിണ്ടർ വീടിന്റെ വാതിൽപ്പടിയിൽ എത്തിച്ചു നൽകുകയുള്ളൂ.
എൽപിജി സിലിണ്ടറുകളുടെ മോഷണം തടയുന്നതിനും ഉപഭോക്താക്കളെ തിരിച്ചറിയുന്നതിനുമായി ഡെലിവറി ഓതന്റിക്കേഷൻ കോഡ് (ഡിഎസി) എന്ന പേരിൽ എണ്ണ കമ്പനികൾ പുതിയ സംവിധാനം നടപ്പിലാക്കിയിട്ടുണ്ട്. ഇതിന്റെ ഭാഗമായാണ് ഗ്യാസ് സിലിണ്ടറുകൾ ബുക്ക് ചെയ്ത ഉപഭോക്താവിന് ഒടിപി നിർബന്ധമാക്കിയത്. എൽപിജി സിലിണ്ടറുകളുടെ ഹോം ഡെലിവറിക്ക് വേണ്ടിയുള്ള ഡിഎസി സംവിധാനം 100 സ്മാർട്ട് സിറ്റികളിൽ ആദ്യം നടപ്പാക്കുകയും പിന്നീടതിന്റെ പ്രവർത്തനം സുഗമമാണെങ്കിൽ കൂടുതൽ സ്ഥലങ്ങളിലേക്ക് വിപുലീകരിക്കുകയും ചെയ്യും. രാജസ്ഥാനിലെ ജയ്പൂരിൽ ഇതിനകം ഒരു പൈലറ്റ് പ്രോജക്റ്റ് നടക്കുന്നുണ്ട്.
എൽപിജി സിലിണ്ടർ ഡെലിവറിയുടെ പുതിയ ഡിഎസി പ്രക്രിയ വളരെ ലളിതമാണ്. ഉപഭോക്താവ് എൽപിജി സിലിണ്ടർ ബുക്ക് ചെയ്യുമ്പോൾ അവർക്ക് രജിസ്റ്റർ ചെയ്ത മൊബൈൽ നമ്പറിൽ ഒരു കോഡ് / ഒടിപി ലഭിക്കും. ഡെലിവറി സമയത്ത് ഈ ഒടിപി കാണിച്ച് ഗ്യാസ് സിലിണ്ടർ സ്വീകരിക്കാം. തെറ്റായ വ്യക്തിക്ക് ഡെലിവറി നടത്തിയിട്ടില്ലെന്ന് ഇത് ഉറപ്പാക്കുകയും ചെയ്യും.
ഡിഎസിയെക്കുറിച്ച് നിങ്ങൾ അറിയേണ്ടതെല്ലാം:
- രജിസ്റ്റർ ചെയ്ത മൊബൈൽ നമ്പറിൽ ലഭിച്ച കോഡ് / ഒടിപി കാണിക്കുമ്പോൾ മാത്രമേ ഡെലിവറി പൂർത്തിയാകൂ.
- മൊബൈൽ നമ്പർ അപ്‌ഡേറ്റ് ചെയ്തിട്ടില്ലെങ്കിൽ ഗ്യാസ് സിലിണ്ടർ ബുക്ക് ചെയ്യുന്ന സമയത്ത് ആപ്ലിക്കേഷന്റെ സഹായത്തോടെ അപ്‌ഡേറ്റ് ചെയ്യുകയും കോഡ് ജനറേറ്റ് ചെയ്യുകയും ചെയ്യാം.
- ഉപഭോക്താക്കളുടെ വിലാസം, രജിസ്റ്റർ ചെയ്ത മൊബൈൽ നമ്പർ തുടങ്ങിയ വിശദാംശങ്ങൾ തെറ്റാണെങ്കിൽ ഗ്യാസ് സിലിണ്ടറിന്റെ വിതരണം തടസ്സപ്പെടും.
- വാണിജ്യ സിലിണ്ടറുകൾക്ക് സിസ്റ്റം ബാധകമല്ല.
- നവംബർ 1 മുതൽ രാജ്യത്തെ 100 സ്മാർട്ട് സിറ്റികളിലുടനീളം എൽപിജി സിലിണ്ടർ ഹോം ഡെലിവറികൾക്കായി ഉപഭോക്താവിന്റെ വിലാസവും മൊബൈൽ നമ്പറും കൃത്യമായി നൽകേണ്ടതുണ്ട്.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
