തൃശൂർ: മദ്യം വിലകുറച്ച് നല്കാത്തതിന് പേരിൽ ബാര് അടിച്ച് തകര്ക്കുകയും ജീവനക്കാരെ ആക്രമിച്ച് പരിക്കേല്പ്പിക്കുകയും ചെയ്ത കേസില് രണ്ട് പേരെ ഗുരുവായൂര് പൊലീസ് അറസ്റ്റ് ചെയ്തു. ഇരിങ്ങപ്പുറം സ്വദേശികളായ കുരുടി എന്ന് വിളിക്കുന്ന അഭിഷേക്, കണ്ണാരത്ത് ശ്രീഹരി എന്നിവരെയാണ് എസ് ഐ കെ ജി ജയപ്രദീപിന്റെ നേതൃത്വത്തിലുള്ള പൊലീസ് സംഘം അറസ്റ്റ് ചെയ്തത്.
കോട്ടപ്പടി ഫോര്ട്ട് ഗേറ്റ് ബാറില് രാത്രി പത്തരയോടെയാണ് സംഭവം നടന്നത്. അറസ്റ്റിലായവര് അടക്കം നാല് പേര് ബാറിലെത്തി പെഗ്ഗിന് 140 രൂപ വിലയുള്ള മദ്യം 100 രൂപയ്ക്ക് നല്കാനാവശ്യപ്പെട്ടു. ഇതേ ചൊല്ലി ബാര് ജീവനക്കാരുമായി തര്ക്കമായി. ഉന്തും തള്ളിനുമൊടുവില് മടങ്ങി പോയ സംഘം ഇരുമ്പ് പൈപ്പുകളും മരവടികളുമായി തിരിച്ചെത്തി ബാറിന് മുന്നിലെ ചില്ലുകള് അടിച്ച് തകര്ക്കുകയായിരുന്നു. ബാര് മാനേജരെ മര്ദ്ദിച്ച് പരിക്കേല്പ്പിക്കുകയും ചെയ്തു. രണ്ട് ലക്ഷം രൂപയുടെ നഷ്ടം സംഭവിച്ചതായി ബാറുടമ പൊലീസില് പരാതി നല്കി. പ്രതികളെ പിടികൂടി കോടതിയില് ഹാജരാക്കി റിമാന്റ് ചെയ്തു.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
