കുഞ്ഞുങ്ങളുടെ ഉറക്കം മുതിർന്നവരിൽ നിന്ന് വളരെ വ്യത്യസ്തമാണെന്ന് നമുക്കറിയാം. നവജാതശിശുക്കളുടെ കാര്യത്തിൽ, ഉറങ്ങുന്ന സമയം വളരെ നീണ്ടതായിരിക്കാം, അതില്‍ പ്രത്യേകിച്ച് ക്രമവും കണ്ടെത്താന്‍ സാധിക്കില്ല. തൽഫലമായി, കുട്ടി ഒരു നിശ്ചിത പ്രായത്തിൽ എത്തുന്നതുവരെ മാതാപിതാക്കളുടെ ഉറക്കം അൽപ്പം പ്രശ്നമായേക്കാം.
പ്രത്യേകിച്ച് അമ്മമാരെയാണ് ഈ പ്രതിസന്ധി ഏറ്റവും കൂടുതൽ ബാധിക്കുന്നത്. എന്നാൽ ആറുമാസം കഴിഞ്ഞും കുഞ്ഞിന് വേണ്ടത്ര ഉറക്കം ലഭിച്ചില്ലെങ്കിൽ എന്തുചെയ്യും? പ്രത്യേകിച്ച് രാത്രിയിൽ കുഞ്ഞ് ഉറങ്ങുന്നില്ലെങ്കിൽ!
ഭൂരിഭാഗം ആളുകളും ഇതൊരു പ്രശ്നമായാണ് കാണുന്നത്. എന്നാല്‍ കുഞ്ഞുങ്ങള്‍ സാധാരണ പോലെ ഉറങ്ങിത്തുടങ്ങുന്നതിന് ആറ് മാസമെന്നോ ഒരു വയസെന്നോ ഒക്കെയുള്ള സമയപരിധി മാതാപിതാക്കള്‍ നിശ്ചയിക്കുന്നത് കൊണ്ടാണ് ഈ പ്രശ്‌നമുണ്ടാകുന്നതെന്ന് ചൂണ്ടിക്കാട്ടുകയാണ് പുതിയൊരു പഠനം.
മക്ഗിൽ യൂണിവേഴ്‌സിറ്റിയിലെ ഗവേഷകരുടെ നേതൃത്വത്തിൽ നടത്തിയ പഠനം സ്ലീപ്പ് മെഡിസിൻ എന്ന ആരോഗ്യ ജേർണലിൽ പ്രസിദ്ധീകരിച്ചിട്ടുണ്ട്. ആറുമാസം പ്രായമുള്ള കുഞ്ഞുങ്ങൾക്ക് ഉറക്കം ക്രമമായില്ലെങ്കിലും അവര്‍ രാത്രിയില്‍ ഉറങ്ങിത്തുടങ്ങിയില്ലെങ്കിലും അതില്‍ അസാധാരണമായി ഒന്നുമില്ലെന്നാണ് പഠനം ചൂണ്ടിക്കാട്ടുന്നത്.
ഓരോ കുട്ടിക്കും ഉറക്കത്തിന്റെ രീതി വ്യത്യസ്തമാണെന്നും മാതാപിതാക്കളുടെ ശീലങ്ങളുമായി ബന്ധപ്പെട്ടിരിക്കാമെന്നും പഠനം ചൂണ്ടിക്കാട്ടുന്നു. ഉദാഹരണത്തിന്, മുലയൂട്ടുന്നുണ്ടെങ്കിൽ, കുഞ്ഞ് അവരുടെ വശത്ത് ഉറക്കിക്കിടത്തുകയാണെങ്കില്‍, അവർ ഇടയ്ക്കിടെ ഉണരാൻ സാധ്യതയുണ്ട്. എന്നാല്‍ ഇത് കുഞ്ഞിന് ശല്യമായിക്കൊണ്ടുള്ള ഉറക്കപ്രശ്‌നമാകണമെന്നില്ലെന്നും ഗവേഷകര്‍ വ്യക്തമാക്കുന്നു.
കുഞ്ഞിന്റെ ഉറക്കത്തെക്കുറിച്ച് മാതാപിതാക്കൾക്ക് പല തെറ്റിദ്ധാരണകളും ഉണ്ട്. അത്തരം ധാരണകളെ അടിസ്ഥാനമാക്കി ചിന്തിക്കുമ്പോൾ, ഇത്തരം ധാരണകളെ അടിസ്ഥാനപ്പെടുത്തി ചിന്തിക്കുന്നതിനാലാണ് ആറ് മാസത്തിനിപ്പുറവും കുഞ്ഞ് രാത്രിയില്‍ കൃത്യമായി ഉറങ്ങാത്തത് ‘അസ്വാഭാവികമായി’ ആയി തോന്നുന്നത്. ഇതിൽ പ്രത്യേകിച്ച് അസ്വാഭാവികതകളൊന്നുമില്ല- പഠനം ഓർമിപ്പിക്കുന്നു. കുട്ടികളെ അവരുടെ ശീലങ്ങളുമായി പൊരുത്തപ്പെടാൻ സമയം അനുവദിക്കുക, ഒപ്പം തന്നെ മാതാപിതാക്കളുടെ ശീലങ്ങളും അതിനനുസരിച്ച് മാറ്റുക. ഇക്കാര്യത്തിൽ ഇത്രയേ ചെയ്യാനുള്ളൂവെന്ന് പഠനം പറയുന്നു.
നേരെമറിച്ച്, കുഞ്ഞ് കരയുകയോ അസ്വസ്ഥത അനുഭവപ്പെടുകയോ ചെയ്യുന്നത് പതിവാണെങ്കില്‍, ഒരു ഡോക്ടറെ കാണേണ്ടത് പ്രധാനമാണ്. ഏതെങ്കിലും തരത്തിലുള്ള ആരോഗ്യപ്രശ്നങ്ങളുടെ ഭാഗമായി കുഞ്ഞ് അസ്വസ്ഥത കാണിക്കുന്നുണ്ടോയെന്ന് സ്ഥിരീകരിക്കാനാണിത്.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
