കർണാടകയിൽ വോട്ടെണ്ണൽ പുരോഗമിക്കുമ്പോൾ കോൺഗ്രസ് വ്യക്തമായ ലീഡ് നേടി മുന്നേറുകയാണ്. വോട്ടെണ്ണൽ ആരംഭിക്കുന്നതിന് മുമ്പ് തന്നെ ഡൽഹിയിലെ കോൺഗ്രസ് ഓഫീസിൽ പ്രവർത്തകർ ആഘോഷം തുടങ്ങിയിരുന്നു. രാഹുൽ ഗാന്ധിയുടെ ഭാരത് ജോഡോ യാത്രയുടെ വീഡിയോ സോഷ്യൽ മീഡിയയിൽ പങ്കുവെച്ച് കോൺഗ്രസ് പ്രവർത്തകർ ആഘോഷിച്ചു.
‘ഞാൻ അജയ്യനാണ്, എനിക്ക് ആത്മവിശ്വാസമുണ്ട്, അതെ ഇന്ന് എന്നെ തടയാൻ കഴിയില്ല’ എന്ന അടിക്കുറിപ്പോടെയാണ് കോൺഗ്രസ് രാഹുലിന്റെ വീഡിയോ ഔദ്യോഗിക അക്കൗണ്ടിൽ പങ്കുവെച്ചത്.
ഡൽഹിയിൽ കോൺഗ്രസ് പ്രവർത്തകർ ഒത്തുകൂടി പാട്ടും നൃത്തവും തുടങ്ങി. ആലാപനവും ഭാംഗ്ര നൃത്തവുമായി ഡൽഹിയിലെ കോൺഗ്രസ് ആസ്ഥാനം ഉത്സവാന്തരീക്ഷത്തിലാണ്. പാർട്ടി അധ്യക്ഷൻ മല്ലികാർജുൻ ഖാർഗെ കർണാടകയിലെ വിജയത്തിന് നന്ദി പറഞ്ഞു. പാർട്ടി നേതാക്കളായ സോണിയ ഗാന്ധി, രാഹുൽ ഗാന്ധി, പ്രിയങ്ക ഗാന്ധി വദ്ര എന്നിവർക്ക് വേണ്ടി പ്രവർത്തകർ മുദ്രാവാക്യം മുഴക്കി.
വോട്ടെണ്ണൽ തുടങ്ങി ആദ്യ രണ്ട് മണിക്കൂർ പിന്നിടുമ്പോൾ കോൺഗ്രസ് 114 സീറ്റുകളിൽ ലീഡ് ചെയ്യുന്നു. 78 സീറ്റുകളിലാണ് ബിജെപി ലീഡ് ചെയ്യുന്നത്. ജെഡിഎസ് 27 സീറ്റുകളിലും മറ്റുള്ളവർ 5 സീറ്റുകളിലും ലീഡ് ചെയ്യുന്നു.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
