ദില്ലി: പ്രധാനമന്ത്രി നരേന്ദ്ര മോദി എല്ലാ ഇന്ത്യന്‍ മൊബൈല്‍ ഉപഭോക്‌താക്കള്‍ക്കും മൂന്ന് മാസത്തെ സൗജന്യ മൊബൈല്‍ റീച്ചാര്‍ജ് നല്‍കുന്നതായി സാമൂഹ്യമാധ്യമങ്ങളില്‍ പ്രചാരണമുണ്ടായിരുന്നു. മോദി പൗരന്‍മാര്‍ക്ക് പുതുവല്‍സര സമ്മാനമായി മൂന്ന് മാസത്തെ ഫ്രീ റീച്ചാര്‍ജ് നല്‍കുന്നു എന്നാണ് സന്ദേശത്തില്‍ പറയുന്നത്. പ്രധാനമായും വാട്‌സ്ആപ്പിലാണ് റീച്ചാര്‍ജ് ചെയ്യാന്‍ എന്നവകാശപ്പെടുന്ന ലിങ്ക് സഹിതം പ്രചാരണം സജീവമായിരിക്കുന്നത്.
ബിജെപി ഫ്രീ റീച്ചാര്‍ജ് യോജന എന്ന തലക്കെട്ടില്‍ ഒരു വെബ്‌സൈറ്റിന്‍റെ ലിങ്ക് സഹിതമാണ് വാട്‌സ്ആപ്പില്‍ സന്ദേശം വൈറലായിരിക്കുന്നത്. എല്ലാ ഇന്ത്യന്‍ മൊബൈല്‍ യൂസര്‍മാര്‍ക്കും പ്രധാനമന്ത്രി നരേന്ദ്ര മോദി മൂന്ന് മാസത്തെ സൗജന്യ മൊബൈല്‍ റീച്ചാര്‍ജ് നല്‍കുന്നു. പുതുവല്‍സര ആഘോഷങ്ങളുടെ ഭാഗമായാണ് ഇത്. ഇങ്ങനെ റീച്ചാര്‍ജ് ചെയ്യുന്നതിലൂടെ കൂടുതല്‍ പേര്‍ക്ക് ബിജെപിക്ക് വോട്ട് ചെയ്യാനാവുകയും 2024 പൊതുതെരഞ്ഞെടുപ്പിലും എന്‍ഡിഎ സര്‍ക്കാരിന് അധികാരത്തിലെത്താന്‍ കഴിയുമെന്നും സന്ദേശത്തില്‍ പറയുന്നു. മൂന്ന് മാസത്തെ സൗജന്യ റീച്ചാര്‍ജ് സൗകര്യം ലഭിക്കാന്‍ ചുവടെ കാണുന്ന ലിങ്കില്‍ ക്ലിക്ക് ചെയ്യാന്‍ സന്ദേശത്തില്‍ ആവശ്യപ്പെടുന്നു.
എന്നാല്‍ ഈ പ്രചാരണം വ്യാജമാണ്. ഇത്തരത്തിലൊരു സൗജന്യ മൊബൈല്‍ റീച്ചാര്‍ജ് പദ്ധതി ഇന്ത്യന്‍ സര്‍ക്കാരിനില്ലെന്ന് പ്രസ് ഇന്‍ഫര്‍മേഷന്‍ ബ്യൂറോയുടെ ഫാക്ട് ചെക്ക് വിഭാഗം അറിയിച്ചു. വ്യാജ സന്ദേശമാണ് പ്രചരിക്കുന്നത് ഇതില്‍ ആരും ക്ലിക്ക് ചെയ്ത് വഞ്ചിതരാവരുത് .വാട്‌സ്ആപ്പ് സന്ദേശത്തിലെ ലിങ്കില്‍ ക്ലിക്ക് ചെയ്ത് വ്യക്തിവിവരങ്ങള്‍ ആരും കൈമാറരുത്.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
