കോഴിക്കോട്: തെറ്റായ ദിശയിൽ വന്ന കാർ നിയന്ത്രണം വിട്ട് സമീപത്തെ വർക്ക് ഷോപ്പിലേക്ക് ഇടിച്ച് കയറി മൂന്ന് ബൈക്കുകൾ തകർന്നു. ഒരു ഇന്നോവ കാറിനും കേടുപാടുകൾ സംഭവിച്ചു. പൂവാട്ട്പറമ്പിൽ ഇന്ന് രാവിലെയാണ് അപകടം. സംഭവത്തിൽ ആർക്കും പരിക്കില്ല. സംഭവത്തിൻ്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്.
മാവൂർ-കോഴിക്കോട് റോഡിൽ പൂവാട്ട്പറമ്പിലെ വളവിലാണ് അപകടം. കോഴിക്കോട് ഭാഗത്തേക്ക് വരികയായിരുന്ന ഹ്യുണ്ടായ് ഐ20 കാർ തെറ്റായ ദിശയിലാണ് സഞ്ചരിച്ചിരുന്നത്. അമിത വേഗതയിൽ വരുന്നതിനിടെ എതിരെ വന്ന ഇലക്ട്രിക് ഓട്ടോയിൽ ഇടിക്കാതിരിക്കാൻ പെട്ടെന്ന് തെന്നിമാറി നിയന്ത്രണം വിട്ട് സമീപത്തെ കടയിലേക്ക് ഇടിച്ചു കയറുകയായിരുന്നു.
വർക്ക്ഷോപ്പിൽ പാർക്ക് ചെയ്തിരുന്ന വാഹനങ്ങൾക്ക് കേടുപാടുകൾ സംഭവിച്ചു. ഈ സമയം ജീവനക്കാരെല്ലാം അകത്തുണ്ടായിരുന്നതിനാൽ വൻ ദുരന്തം ഒഴിവായി. പത്ത് ദിവസം മുമ്പ് ഇതേ സ്ഥലത്ത് ഒരു കാർ ഇടിച്ച് കേടുപാടുകൾ സംഭവിച്ചിരുന്നു. 13 സ്കൂട്ടറുകൾക്കും രണ്ട് കാറുകൾക്കും അന്ന് കേടുപാടുകൾ സംഭവിച്ചു.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
