കോഴിക്കോട്: ന്യൂനപക്ഷ വിഭാഗങ്ങള്‍ക്ക് ആകർഷക നിരക്കില്‍ കൂടുതല്‍ വായ്പ പ്രഖ്യാപിച്ച്‌ കോഴിക്കോട് ആസ്ഥാനമായി പ്രവർത്തിക്കുന്ന, സർക്കാർ സ്ഥാപനമായ സംസ്ഥാന ന്യൂനപക്ഷ വികസന ധനകാര്യ കോർപറേഷൻ (കെ.എസ്.എം.ഡി.എഫ്.സി).
ചെറുകിട സ്വയം തൊഴില്‍ സംരംഭങ്ങള്‍ തുടങ്ങാൻ ആറു ശതമാനം നിരക്കില്‍ 20 ലക്ഷം രൂപവരെ വായ്പ നല്‍കുമെന്ന് ചെയർമാൻ സ്റ്റീഫൻ ജോർജ് അറിയിച്ചു. കുടുംബ വാർഷിക വരുമാനം ഗ്രാമങ്ങളില്‍ 98,000 രൂപയും നഗരങ്ങളില്‍ 1,20,000 രൂപയുമാണ് പരിധി. വായ്പ ലഭിച്ച്‌ ആറുമാസത്തിനുശേഷം തിരിച്ചടവ് തുടങ്ങിയാല്‍ മതി. 60 മാസമാണ് കാലാവധി.
കുടുംബ വാർഷിക വരുമാനം 1,20,000 മുതല്‍ എട്ടു ലക്ഷത്തിന് താഴെയുള്ളവർക്കും ഈ പദ്ധതിയില്‍ അപേക്ഷിക്കാം. 30 ലക്ഷം വരെയാണ് ഇപ്രകാരം വരുമാനമുള്ളവർക്കുള്ള വായ്പ. പലിശനിരക്ക് വനിതകള്‍ക്ക് ആറു ശതമാനവും പുരുഷന്മാർക്ക് എട്ടു ശതമാനവുമാണ്. ചെറുകിട വ്യവസായ /കച്ചവട സംരംഭങ്ങള്‍, ചെറുകിട സാങ്കേതിക മേഖലകള്‍, ഗതാഗത സേവനം, കൃഷി, കോഴി വളർത്തല്‍, കന്നുകാലി വളർത്തല്‍, മീൻ വളർത്തല്‍, മത്സ്യബന്ധനവും വില്‍പനയും, പരമ്ബരാഗത കരകൗശല മേഖല തുടങ്ങിയവക്കാണ് മുൻഗണന.
അപേക്ഷാഫോമും കൂടുതല്‍ വിവരങ്ങളും കോർപറേഷന്‍റെ www.ksmdfc.org എന്ന വെബ്സൈറ്റില്‍ കിട്ടും. 2013 മുതല്‍ പ്രവർത്തിക്കുന്ന കെ.എസ്.എം.ഡി.എഫ്.സി പ്രവാസികള്‍ക്ക് അഞ്ചു ശതമാനം നിരക്കിലുള്ള പ്രവാസി വായ്പ, വിസ വായ്പ, വിദ്യാഭ്യാസം, ഭവനനിർമാണം, ഉദ്യോഗസ്ഥ വായ്പ, വിവാഹം, രോഗങ്ങള്‍ തുടങ്ങിയവക്കും വായ്പ അനുവദിക്കുന്നുണ്ട്.
വിദ്യാഭ്യാസ മേഖലയില്‍ മൂന്നു ശതമാനം നിരക്കില്‍ ഒരുവർഷം പരമാവധി നാലു ലക്ഷം രൂപയും വിദേശപഠനത്തിന് ആറു ലക്ഷം രൂപയുമാണ് നല്‍കുക. മാനേജിങ് ഡയറക്ടർ സി. അബ്ദുല്‍ മുജീബ്, ഡെപ്യൂട്ടി മാനേജർ എം.കെ. ഷംസുദ്ദീൻ എന്നിവരും വാർത്തസമ്മേളനത്തില്‍ പങ്കെടുത്തു.
ബന്ധപ്പെടാം
കോഴിക്കോട്ടെ ഹെഡ് ഓഫിസിന് പുറമെ അഞ്ചിടത്ത് കെ.എസ്.എം.ഡി.എഫ്.സിക്ക് മേഖല ഓഫിസുകളുണ്ട്. ബന്ധപ്പെടേണ്ട ഫോണ്‍: കാസർകോട്: 04994 283061, 8714603036 കോഴിക്കോട്: 0495 2368366, 8714603032. മലപ്പുറം: 0493 3297017, 8714603035. എറണാകുളം: 0484 2532855, 8714603034. തിരുവനന്തപുരം: 0471 2324232. 8714603033.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
