മുക്കം: പന്നിക്കോട് കടയുടെ മുന്നിൽ വാഹനം പാര്‍ക്ക് ചെയ്തതുമായി ബന്ധപ്പെട്ടുണ്ടായ സംഘര്‍ഷത്തിനിടെ യുവാവിന് കുത്തേറ്റ സംഭവത്തില്‍ പ്രതി പിടിയില്‍. പന്നിക്കോട് താനിക്കല്‍ത്തൊടി സക്കീറി (38) നെയാണ് മുക്കം ഇന്‍സ്പെക്ടര്‍ പ്രജീഷിന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. വധശ്രമത്തിനും അന്യായമായി തടഞ്ഞുവച്ചതിനുമെതിരെ കേസെടുത്ത പ്രതിയെ ഇന്ന് കോടതിയില്‍ ഹാജരാക്കും. കുത്താനുപയോഗിച്ച കത്തി അന്വേഷണ സംഘം കണ്ടെടുത്തിട്ടുണ്ട്. സംഭവ സ്ഥലത്ത് വിരലടയാള വിദഗ്ധര്‍ പരിശോധന നടത്തി.
അതേ സമയം, കഴുത്തിന് കുത്തേറ്റ പന്നിക്കോട് ചോലയ്ക്കല്‍ വീട്ടില്‍ സജീഷ് കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്. ചൊവ്വാഴ്ച രാത്രി ഒമ്ബത് മണിയോടെ മുക്കം പന്നിക്കോടായിരുന്നു സംഭവം. കടയുടെ മുന്നില്‍ വാഹനം പാര്‍ക്ക് ചെയ്തത് പ്രതിയായ ഷക്കീര്‍ ചോദ്യം ചെയ്തപ്പോള്‍ സജീഷ് വാഹനം പിറകോട്ടെടുത്ത് ഷക്കീറിന്‍റെ ബൈക്ക് മറിച്ചിടുകയായിരുന്നു. തുടര്‍ന്ന് രണ്ടു പേരും തമ്മില്‍ കയ്യാങ്കളിയായി. നാട്ടുകാര്‍ ഇടപെട്ട് രണ്ടു പേരെയും പിരിച്ചുവിട്ടെങ്കിലും അല്‍പ്പസമയം കഴിഞ്ഞ് സജീഷ് മറ്റൊരാളെയും കൂട്ടി വീണ്ടും ഷക്കീറിനെ ആക്രമിക്കുകയായിരുന്നു. ഇതിനിടെ ഷക്കീര്‍ തൊട്ടടുത്ത കടയില്‍ നിന്ന് കത്തിയെടുത്ത് സജീഷിനെ കുത്തുകയായിരുന്നു. ഷക്കീറിനും സാരമായി പരിക്കേറ്റിട്ടുണ്ട്.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
