കളന്തോട് കൂളിമാട് റോഡിന്റെ ശോചനീയാവസ്ഥ: ഓഫ് റോഡ് യാത്ര നടത്തി യൂത്ത് കോൺഗ്രസ് പ്രതിഷേധം

കളന്തോട് കൂളിമാട് റോഡിന്റെ ശോചനീയാവസ്ഥയിൽ പ്രതിഷേധിച്ച് യൂത്ത് കോൺഗ്രസ് വേറിട്ട പ്രതിഷേധം സംഘടിപ്പിച്ചു. ചിറ്റാരിപ്പിലാക്കൽ മുതൽ കൂളിമാട് വരെ ഓഫ് റോഡ് യാത്ര നടത്തിയാണ് യൂത്ത് കോൺഗ്രസ് പ്രതിഷേധിച്ചത്.

ഇന്ന് ഈ റോഡ് ഓഫ് റോഡായി മാറിയെന്ന് ഉന്നയിച്ചു സമരത്തിന്റെ ഭാഗമായി യൂത്ത് കോൺഗ്രസ് പ്രതീകാത്മക എം.എൽ.ഏ യെ ഒരുക്കി സന്ദർശനം നടത്തിയും റോഡിലെ വെള്ളം നിറഞ്ഞ കുഴികളിൽ ബോട്ട് ഇറക്കിയുമാണ് പ്രതിഷേധിച്ചത്.

കളന്തോട് കൂളിമാട് റോഡ് 2018 ജൂൺ 28 ന് ആയിരുന്നു അന്നത്തെ പൊതുമരാമത്ത് മന്ത്രിയായിരുന്ന ജി സുധാകരൻ പ്രവൃത്തി ഉദ്ഘാടനം ചെയ്തത്. 25 കോടി രൂപയുടെ പ്രവൃത്തിക്കാണ് ഭരണാനുമതി ലഭിച്ചത്. മലപ്പുറം ജില്ലയിലേക്ക് വളരെ ദൂരെ നിന്ന് എളുപ്പത്തിൽ എത്തിച്ചേരാവുന്ന റോഡാണിത്. കൂടാതെ, NIT, IIM, എം. വി. ആർ കാൻസർ സെന്റർ എന്നിവിടങ്ങളിലേക്ക് എത്താൻ കുറഞ്ഞ ദൂരം മതിയാകും. ഈ പ്രാധാന്യം കണക്കിലെടുത്താണ് ഈ റോഡിന്റെ നവീകരണത്തിന് 25 കോടി രൂപ വകയിരുത്തിയത്.

നിലവിലുള്ള റോഡിന്റെ വീതികൂട്ടുന്ന ഭാഗങ്ങളിൽ ജിഎസ്ബി, ഡബ്ല്യുഎംഎം എന്നിവ ഉപയോഗിച്ച് യഥാക്രമം സബ് ബേസ്, ബേസ് എന്നിവ നിർമിക്കുന്നതിനും റോഡിന്റെ ഉപരിതലത്തിൽ പതിക്കുന്ന മഴവെള്ളത്തിന്റെ സുഗമമായ ഒഴുക്കിനുവേണ്ടി കൾവെർട്ട്, ഡ്രെയിനേജ് എന്നിവയും കാൽനട യാത്രക്കാരുടെ സുരക്ഷിതത്വത്തിനായി ഇരുവശവും 1.50 മീറ്റർ വീതിയിൽ നടപ്പാതയും ഉൾപ്പെടുത്തിയിരുന്നു. റോഡ് സുരക്ഷാ സംവിധാനത്തിനാവശ്യമായ സീബ്രാ ലൈൻ ഉൾപ്പെടെയുള്ള റോഡ് മാർക്കിങ‌്, സ്റ്റഡുകൾ, സൈൻ ബോർഡുകൾ എന്നിവയും സ്കൂൾ പരിസരങ്ങളിലും ജങ‌്ഷനുകളിലും കൈവരിയും സ്ഥാപിക്കുന്നതിനും തീരുമാനിച്ചിരുന്നു.

നിലമ്പൂരിലെ ത്രിമതി കോൺട്രാക്ടിങ് കമ്പനിക്കാണ് കരാർ നൽകിയത്. എന്നാൽ പണി പാതിവഴിയിൽ അവർ കരാറിൽ നിന്ന് പിന്മാറി. അതോടെ റോഡിന്റെ പണിയും നിലച്ചു. റീടെൻഡർ വിളിക്കുകയോ പ്രവൃത്തി തുടങ്ങാൻ നടപടി സ്വീകരിക്കുകയോ ചെയ്തിട്ടില്ലെന്ന് ആരോപിച്ചാണ് യൂത്ത് കോൺഗ്രസ്സ് സമരത്തിനിറങ്ങിയത്.

ചിറ്റാരിപ്പിലാക്കലിൽ നിന്നാരംഭിച്ച ഓഫ് റോഡ് യാത്ര കൂളിമാടിൽ സമാപിച്ചു. ചിറ്റാരിപ്പിലാക്കൽ അങ്ങാടിയിൽ ഗ്രാമപഞ്ചായത്ത് മെമ്പർ ശിവദാസൻ ബംഗ്ലാവിൽ സമരജാഥ ഉൽഘാടനം ചെയ്തു. മണ്ഡലം യൂത്ത് കോൺസ് പ്രസിഡണ്ട് ഫഹദ് പാഴൂർ അധ്യക്ഷത വഹിച്ചു.

കൂളിമാട് അങ്ങാടിയിൽനടന്ന സമാപന പരിപാടി യൂത്ത് കോൺഗ്രസ് കുന്ദമംഗലം നിയോജക മണ്ഡലം പ്രസിഡണ്ട് സുജിത്ത് കാഞ്ഞോളി ഉൽഘാടനം ചെയ്തു. ഫഹദ് പാഴൂർ, ഫൈജാസ് ഇ.പി, ജിയാദ് പി.എ, അനൂപ്ഇ.പി, സാലിം പാഴൂർ, കെ.സി ഇസ്മാലുട്ടി, കെ.വി മുഹമ്മദ് റാഫി, സമദ് പറമ്പിൽ, എം.കെ അബ്ദുല്ല മാസ്റ്റർ, ടി.വി ഷാഫി, എ ടി സലാം, ജൻസ് വടക്കേതൊടി എന്നിവർ നേതൃത്വം നൽകി.

പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.