തിരുവനന്തപുരം: സംസ്ഥാനത്ത് മഴയുടെ ഭീഷണി തുടരുമെന്ന് സൂചിപ്പിച്ച് കേന്ദ്ര കാലാവസ്ഥാ നിരീക്ഷണ കേന്ദ്രം പുതിയ വിജ്ഞാപനം പുറപ്പെടുവിച്ചു.
അടുത്ത ദിവസങ്ങളിൽ മഴ ശക്തമാകുമെന്നാണ് ഏറ്റവും പുതിയ അറിയിപ്പ്. ബംഗാൾ ഉൾക്കടലിൽ രാത്രി ഒമ്പത് മണിയോടെ ന്യൂനമർദം രൂപപ്പെടുന്നത് കേരളത്തിൽ അതിശക്തമായ മഴയ്ക്കുള്ള സാധ്യത വർദ്ധിപ്പിക്കുന്നതായി കാലാവസ്ഥാ നിരീക്ഷണ കേന്ദ്രം അറിയിച്ചു. വടക്ക് പടിഞ്ഞാറന് ബംഗാള് ഉള്കടലില് ഒഡിഷ – പശ്ചിമ ബംഗാള് തീരത്തിനു മുകളിലായാണ് ന്യുന മര്ദ്ദം രൂപപ്പെട്ടത്. അടുത്ത 24 മണിക്കൂറിനുള്ളില് ശക്തിപ്പെടാനാണ് സാധ്യത. തെക്കന് മഹാരാഷ്ട്ര തീരം മുതല് വടക്കന് കേരള തീരം വരെ ന്യുന മര്ദ്ദ പാത്തി രൂപപ്പെട്ടിരിക്കുന്നതും മധ്യ കിഴക്കന് അറബിക്കടലില് ചക്രവാത ചുഴി നിലനില്ക്കുന്നുതിനാലും മണ്സൂണ് പാത്തി അതിന്റെ സാധാരണ സ്ഥാനത്തുനിന്നും തെക്കോട്ടു മാറി സ്ഥിതി ചെയ്യുന്നതിന്റെയും സ്വാധീനത്താല് കേരളത്തില് ആഗസ്റ്റ് 6 മുതല് 10 വരെ ഒറ്റപ്പെട്ട ശക്തമായ മഴയ്ക്ക് സാധ്യത എന്നാണ് കേന്ദ്ര കാലാവസ്ഥ വകുപ്പ് അറിയിച്ചിട്ടുള്ളത്.
കേരളത്തിലെ 8 ജില്ലകളില് രാത്രി കനത്ത മഴയ്ക്ക് സാധ്യതയുണ്ട്. അതേസമയം നേരത്തെ പ്രഖ്യാപിച്ച പ്രകാരം കേരളത്തില് ഇന്ന് നാല് 5 ജില്ലകളില് യെല്ലോ അലര്ട്ട് തുടരുകയാണ്. ഇടുക്കി, കോഴിക്കോട്, വയനാട്, കണ്ണൂര്, കാസര്കോട് ജില്ലകളിലാണ് ഇന്ന് യെല്ലോ അലര്ട്ടുള്ളത്. നാളെ എട്ട് ജില്ലകളിലാണ് നിലവില് യെല്ലോ അലര്ട്ടുള്ളത്. കോട്ടയം, ഇടുക്കി, തൃശൂര്, പാലക്കാട് ,കോഴിക്കോട്, വയനാട്, കണ്ണൂര്, കാസര്കോട് ജില്ലകളിലാണ് നാളെ യെല്ലോ പ്രഖ്യാപിച്ചിട്ടുള്ളത്.
പത്താം തിയതി വരെയുള്ള മഴ ജാഗ്രത
06-08-2022: ഇടുക്കി, കോഴിക്കോട്, വയനാട്, കണ്ണൂര്, കാസര്കോട്
07-08-2022: കോട്ടയം, ഇടുക്കി, തൃശൂര്, പാലക്കാട് ,കോഴിക്കോട്, വയനാട്, കണ്ണൂര്, കാസര്കോട്
08-08-2022: കോട്ടയം, ഇടുക്കി, തൃശൂര്, പാലക്കാട് ,മലപ്പുറം, കോഴിക്കോട്
09-08-2022: കോട്ടയം, ഇടുക്കി, തൃശൂര്, മലപ്പുറം ,കോഴിക്കോട്, വയനാട്, കണ്ണൂര്, കാസര്കോട്
10-08-2022: തൃശൂര്, പാലക്കാട് ,മലപ്പുറം ,കോഴിക്കോട്, വയനാട്, കണ്ണൂര്, കാസര്കോട്
എന്നീ ജില്ലകളിലാണ് മഞ്ഞ അലേര്ട്ട് പ്രഖ്യാപിച്ചിട്ടുള്ളത്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്ത്ഥമാക്കുന്നത്. കഴിഞ്ഞ ദിവസങ്ങളില് വലിയ മഴ ലഭിച്ച പ്രദേശങ്ങളില് മണ്ണിടിച്ചിലിനും ഉരുള്പൊട്ടലിനും സാധ്യത നിലനില്ക്കുന്നതിനാല് മലയോര മേഖലയില് ജാഗ്രത തുടരണം. വനത്തിലും മലയോരങ്ങളിലും മഴ തുടരുന്നതിനാലും അണക്കെട്ടുകളില് നിന്ന് നിയന്ത്രിത അളവില് വെള്ളം പുറത്തേക്ക് ഒഴുക്കുന്നതിനാലും നദികളിലെ ഒഴുക്ക് ശക്തമായിരിക്കും. ആയതിനാല് യാതൊരു കാരണവശാലും ആരും ജലാശയങ്ങളില് ഇറങ്ങാന് പാടില്ല.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
