ഷാർജ: ഈദ് അവധിയും സ്‌കൂളുകൾക്ക് മധ്യവേനൽ അവധിയും വന്നതോടെ യുഎഇയിൽ നിന്ന് കേരളത്തിലേക്കുള്ള വിമാന നിരക്ക് അനിയന്ത്രിതമായി വർധിച്ചതോടെ പുതിയ റൂട്ടുകൾ തേടുകയാണ് പ്രവാസികൾ. യുഎഇയുടെ അയൽ രാജ്യങ്ങളിലെ സന്ദർശക വിസയിൽ റോഡ് മാർഗം യാത്ര ചെയ്ത ശേഷം ആ രാജ്യങ്ങളിലെ വിമാനത്താവളങ്ങൾ വഴിയാണ് പലരും കേരളത്തിലെത്തുന്നത്.
മസ്‌കറ്റിൽ നിന്ന് കോഴിക്കോട്ടേക്ക് നേരിട്ടുള്ള ടിക്കറ്റിന് 750 ദിർഹം മാത്രമാണ് നിരക്ക്, എന്നാൽ യുഎഇയിൽ നിന്നുള്ള ടിക്കറ്റിന് 2000 ദിർഹം വരെയാണ് നിരക്ക്. വിസിറ്റിംഗ് വിസയ്ക്കും ഒമാനിലേക്കുള്ള റോഡ് യാത്രയ്ക്കും ഏകദേശം 150 ദിർഹം മാത്രമേ ചെലവാകൂ. ഇവ രണ്ടും ചേർത്താലും യുഎഇയിൽ നിന്നുള്ള വിമാന ടിക്കറ്റിന്റെ പകുതിയേ വരൂ. ഇതാണ് പലരും ഈ വഴി സ്വീകരിക്കാൻ കാരണം. അൽ ഐനിലെ ഒരു സ്വകാര്യ സ്‌കൂളിലെ നിരവധി അധ്യാപകരാണ് ഈ രീതി സ്വീകരിച്ചത്.
കേരളത്തിലേക്കുള്ള കണക്ടിംഗ് ഫ്‌ളൈറ്റുകളിലും ഇപ്പോൾ ഉയർന്ന നിരക്കാണ് ഈടാക്കുന്നത്. ഡൽഹി, മുംബൈ, ചെന്നൈ, ഹൈദരാബാദ് തുടങ്ങിയ കേരളത്തിന് പുറത്തുള്ള വിമാനത്താവളങ്ങളിൽ താരതമ്യേന കുറഞ്ഞ നിരക്കുകൾ ഉള്ളതിനാൽ, നിരവധി ആളുകൾ ഈ വിമാനത്താവളങ്ങളിൽ യാത്ര ചെയ്യുകയും അവിടെ നിന്ന് ട്രെയിനിലോ ആഭ്യന്തര വിമാനങ്ങളിലോ നാട്ടിലേക്ക് മടങ്ങുകയും ചെയ്യുന്നു. ഇക്കാരണത്താൽ ദീർഘനേരം യാത്രയ്ക്കായി മാറ്റിവെക്കേണ്ടിവരുന്നു.
എന്തായാലും കേരളത്തിൽ ഇത്തവണ ബലിപെരുന്നാൾ ജൂൺ 29 ന് ആയതിനാൽ ഇത്തരക്കാർക്ക് അനുഗ്രഹമാണ്. ഇത്തിഹാദ് എയർവേയ്‌സിൽ 350 മുതൽ 500 ദിർഹം വരെ നൽകിയാണ് നിരവധി പേർ അബുദാബിയിൽ നിന്ന് മുംബൈയിലേക്ക് യാത്ര ചെയ്തത്. ഈ ടിക്കറ്റ് ഹാൻഡ് ബാഗേജിന് മാത്രമേ അനുവദിക്കൂ, എന്നാൽ ഈ സമയത്തു കുറഞ്ഞ നിരക്കിൽ ടിക്കറ്റ് ലഭ്യമായതിന്റെ ആശ്വാസത്തിലാണ് പ്രവാസികൾ.
യുഎഇയിൽ നിന്ന് കേരളത്തിലെ വിവിധ വിമാനത്താവളങ്ങളിലേക്ക് 2000 മുതൽ 3350 ദിർഹം വരെയാണ് വിവിധ വിമാനക്കമ്പനികൾ ഈടാക്കുന്നത്. കഴിഞ്ഞ ദിവസങ്ങളിൽ 3000 ദിർഹം മുതൽ 4000 ദിർഹം വരെ നൽകി ടിക്കറ്റെടുത്തവരുണ്ട്. പ്രവാസികൾ ഏറെ കാത്തിരുന്ന ചാർട്ടേഡ് വിമാനങ്ങൾ തുടങ്ങുമെന്ന കേരള സർക്കാരിന്റെ പ്രഖ്യാപനം എങ്ങുമെത്തിയില്ല, തിരക്കേറിയ സമയങ്ങളിൽ അധിക സർവീസുകൾ തുടങ്ങണമെന്ന ആവശ്യം കേന്ദ്രം അംഗീകരിച്ചില്ല. ഇതൊക്കെയാണ് പ്രവാസികള്‍ക്ക് തിരിച്ചടിയായത്.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
