തിരുവമ്പാടിയില്‍ പതിനാലുകാരിയെ കടത്തിക്കൊണ്ടുപോയ കേസില്‍ റിമാന്‍ഡിലായ അജയ് നിരവധി മോഷണക്കേസില്‍ പ്രതി. കോഴിക്കോട് ജില്ലയിലടക്കം പല സ്റ്റേഷനിലും ഇയാള്‍ക്കെതിരെ ബൈക്ക് മോഷണക്കേസുകള്‍ രജിസ്റ്റര്‍ ചെയ്തിട്ടുണ്ടെന്നു കണ്ടെത്തി.
പെണ്‍കുട്ടിയെ കടത്തിക്കൊണ്ട് പോകുന്നതിന് അഞ്ചു ദിവസം മുമ്പും അജയ് ഒരു ബൈക്ക് മോഷ്ടിച്ചതായി കണ്ടെത്തിയിട്ടുണ്ട്. കളമശ്ശേരിയില്‍ രജിസ്റ്റര്‍ ചെയ്ത കേസില്‍ ഇയാള്‍ നേരത്തെ ജയില്‍ ശിക്ഷ അനുഭവിച്ചിട്ടുണ്ട്.
ഒപ്പന പഠിക്കാനെന്ന് പറഞ്ഞ് ഒക്ടോബര്‍ അഞ്ചിന് വീട്ടില്‍ നിന്നുപോയ പതിനാലുകാരി തിരിച്ചു വരാത്തതിനെ തുടര്‍ന്ന് രക്ഷിതാക്കള്‍ മുക്കം പോലീസില്‍ പരാതിപ്പെട്ടു. പോലീസ് അന്വേഷണത്തില്‍ രണ്ട് ദിവസം മുമ്പ് പെണ്‍കുട്ടിയെ കോയമ്പത്തൂരില്‍ വച്ചാണ് കണ്ടെത്തിയത്. കോയമ്പത്തൂര്‍ റെയില്‍വേ സ്റ്റേഷനില്‍ അജയ്‌ക്കൊപ്പമായിരുന്നു പെണ്‍കുട്ടി ഉണ്ടായിരുന്നത്.
പെണ്‍കുട്ടിയുടെ സഹോദരന്റെ സുഹൃത്തായ പ്രതിയെ കുറിച്ച് പൊലീസ് നടത്തിയ അന്വേഷണത്തിലാണ് മോഷണക്കേസ് അടക്കം കണ്ടെത്തിയത്. പെണ്‍കുട്ടിയെ തട്ടിക്കൊണ്ടുപോകുന്നതിന് അഞ്ചു ദിവസം മുമ്പ് ഓമശ്ശേരി വേനപ്പാറയില്‍ നിന്നാണ് ഇയാള്‍ ബൈക്ക് മോഷ്ടിച്ചത്. സി സി ടി വി പരിശോധനയിലാണ് ഇയാളെ തിരിച്ചറിഞ്ഞത്.
പെണ്‍കുട്ടിയുടെ സഹോദരങ്ങള്‍ കൊച്ചിയില്‍ പണിക്കു പോയപ്പോഴാണ് പീരുമേട് സ്വദേശിയായ അജയുമായി പരിചയപ്പെട്ടത്. പിന്നാലെ ഇയാള്‍ 14 കാരിയുമായി സൗഹൃദത്തിലാവുകയായിരുന്നു. തുടര്‍ന്നു പ്രണയം നടിച്ചാണ് പെണ്‍കുട്ടിയെ കടത്തിക്കൊണ്ടുപോയത്.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
