വിജയവാഡ: രോഗിയായ മൂത്ത മകളുടെ ചികിത്സയ്ക്കായി പണം സ്വരൂപിക്കുന്നതിന് മാതാപിതാക്കൾ ഇളയ മകളെ വിറ്റു. ആന്ധ്രാപ്രദേശിലെ നെല്ലൂരിലാണ് ഞെട്ടിക്കുന്ന സംഭവം. അയൽവാസിയായ ചിന്ന സുബ്ബയ്യ (46) ആണ് കുഞ്ഞിനെ വില കൊടുത്ത് വാങ്ങിയത്. സംഭവത്തിൽ സുബ്ബയ്ക്കെതിരെ പോലീസ് കേസെടുത്തു. ഇയാളെ ചോദ്യം ചെയ്യുകയാണെന്ന് അന്വേഷണ സംഘം അറിയിച്ചു.
ദമ്പതികളുടെ മൂത്ത മകൾക്ക് (16) ശ്വാസകോശ സംബന്ധമായ അസുഖമുണ്ടായിരുന്നു. ഇതിനുള്ള ചികിത്സയ്ക്കായാണ് അവരുടെ പന്ത്രണ്ടു വയസ്സുള്ള ഇളയ മകളെ വിറ്റത്.
നേരത്തെ വിവാഹിതയായ സുബ്ബയ്യയുടെ ഭാര്യ കുടുംബ പ്രശ്നങ്ങൾ കാരണം ഇയാളെ ഉപേക്ഷിച്ചതായി പോലീസ് പറഞ്ഞു. ഇതിനു ശേഷമാണ് 12 വയസുകാരിയായ ഇളയ മകളെ വിവാഹം കഴിക്കാനുള്ള ആഗ്രഹം പ്രകടിപ്പിച്ച് കുട്ടിയുടെ മാതാപിതാക്കളെ സമീപിച്ചത്. മുമ്പ് ഇതേ ആവശ്യവുമായി അവരെ സമീപിച്ചിട്ടുണ്ടെന്നാണ് റിപ്പോർട്ട്. മൂത്ത മകളുടെ ചികിത്സയ്ക്കായി പണം കണ്ടെത്താൻ കഴിയുന്നില്ലെന്ന ആശങ്കയിലായ മാതാപിതാക്കൾ ഒടുവിൽ അയൽവാസിയുടെ വാഗ്ദാനങ്ങള്ക്ക് മുന്നില് വഴങ്ങുകയായിരുന്നു. അവർ 25,000 രൂപ ആവശ്യപ്പെട്ടെങ്കിലും വിലപേശലിന്റെ അവസാനം സുബ്ബയ്യ 10,000 രൂപ നൽകി.
കഴിഞ്ഞ ബുധനാഴ്ച പണം നൽകിയ ശേഷമാണ് ഇയാൾ പെൺകുട്ടിയെ വിവാഹം കഴിച്ചത്. അന്നുതന്നെ അദ്ദേഹം വധുവിനൊപ്പം ജന്മനാടായ ധാംപൂരിലേക്ക് മടങ്ങി. രാത്രിയിൽ വീട്ടിൽ നിന്ന് ഉച്ചത്തിലുള്ള നിലവിളികളും അലര്ച്ചയും കേട്ടപ്പോൾ പ്രദേശവാസികൾ ഗ്രാമത്തലവന്റെ സഹായത്തോടെ ചൈൽഡ് ലൈൻ അധികൃതരെ അറിയിച്ചു.
വീട്ടിൽ നിന്ന് ശബ്ദം കേട്ട നാട്ടുകാർ എന്താണ് സംഭവിക്കുന്നതെന്ന് അറിയാൻ സുബ്ബയ്യയുടെ വീട്ടിലെത്തി. പെൺകുട്ടിയെ ജില്ലാ ശിശു സംരക്ഷണ കേന്ദ്രത്തിലേക്ക് കൊണ്ടുപോയി. അവിടെ നിന്ന് കൗൺസിലിംഗ് നടത്തുന്നുണ്ടെന്ന് അധികൃതർ അറിയിച്ചു.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
