സംസ്ഥാനത്തെ 5.87 ലക്ഷം വരുന്ന മഞ്ഞ റേഷൻ കാർഡ് ഉടമകൾക്കും സർക്കാർ അംഗീകൃത ക്ഷേമ സ്ഥാപനങ്ങളിലെ അൻപതിനായിരത്തോളം അന്തേവാസികൾക്കും ഓണക്കിറ്റ് നൽകുന്ന കാര്യത്തിൽ തീരുമാനമായി. ക്ഷേമ സ്ഥാപനങ്ങളിലെ നാല് അംഗങ്ങൾക്ക് ഒന്ന് വീതമായിരിക്കും കിറ്റ് നൽകുക.
ഏകദേശം 500 രൂപ വിലവരുന്ന 14 ഇനങ്ങൾ ഉൾപ്പെടുത്തിയാകും ഓണക്കിറ്റ് നൽകുക. കിറ്റിലെ ഇനങ്ങൾ സംബന്ധിച്ച വിവരങ്ങൾ പുറത്തുവിട്ടിട്ടില്ല. കിറ്റ് വിതരണം എന്നുമുതൽ ആരംഭിക്കുമെന്ന കാര്യത്തിൽ സർക്കാർ വ്യക്തത വരുത്തിയിട്ടില്ല. കഴിഞ്ഞവർഷം തുണിസഞ്ചി ഉൾപ്പെടെ 14 ഇനങ്ങളാണ് ഓണക്കിറ്റിൽ ഉണ്ടായിരുന്നത്.
അടിസ്ഥാന ജനവിഭാഗങ്ങൾക്ക് അനുവദിച്ച കിറ്റ് സൗജന്യമായി വിതരണം ചെയ്യാൻ തയ്യാറാണെന്ന് റേഷൻ വ്യാപാരി പ്രതിനിധികൾ അറിയിച്ചു. ഭക്ഷ്യ പൊതുവിതരണ വകുപ്പ് വിളിച്ച യോഗത്തിൽ മന്ത്രി ജി ആർ അനിൽ മുന്നോട്ടുവെച്ച ആവശ്യം വ്യാപാരി പ്രതിനിധികൾ അംഗീകരിക്കുകയായിരുന്നു. അതേസമയം, മുൻപ് വിതരണം ചെയ്ത കിറ്റുകളുടെ കമ്മീഷൻ കുടിശിക നൽകണമെന്ന പ്രതിനിധികളുടെ ആവശ്യത്തിന് മന്ത്രി മറുപടി നൽകി. കമ്മീഷൻ നൽകണമെന്ന സുപ്രീം കോടതിയുടെ വിധി നടപ്പാക്കുമെന്ന് മന്ത്രി അറിയിച്ചു.
കിറ്റ് വിതരണം സംബന്ധിച്ച അറിയിപ്പ് വൈകാതെ ഉണ്ടാകുമെന്നാണ് റിപ്പോർട്ട്. മന്ത്രിയുടെ സാന്നിധ്യത്തിൽ ചേർന്ന യോഗത്തിൽ ചോട്ടു ഗ്യാസിന് പുറമേ വലിയ എൽപിജി സിലിണ്ടറും മിൽമയുടെ പാൽ ഉൾപ്പെടെയുള്ള ഉൽപന്നങ്ങലും വിതരണം ചെയ്യാനുള്ള സംവിധാനം ഒരുക്കി കെ സ്റ്റോറുകളുടെ എണ്ണം വ്യാപിപ്പിക്കാനും ധാരണയായി.
ഇത്തവണ എല്ലാവർക്കും ഓണക്കിറ്റ് ഉണ്ടാകില്ലെന്ന് ധനമന്ത്രി കെ എൻ ബാലഗോപാൽ വ്യക്തമാക്കിയിരുന്നു. കൊവിഡിൻ്റെ സമയത്ത് നൽകിയത് പോലെ ഓണക്കിറ്റ് വിതരണം ചെയ്യാനാകില്ല. കൊവിഡ് സമയത്തെ സാഹചര്യം ഇപ്പോൾ സംസ്ഥാനത്തില്ലെന്നും ധനമന്ത്രി പറഞ്ഞിരുന്നു. സംസ്ഥാനത്ത് വിലക്കയറ്റം രൂക്ഷമായിരിക്കെ കിറ്റ് വിതരണത്തിൽ വിവേചനം പാടില്ലെന്ന ആവശ്യം ശക്തമാണ്.
അതേസമയം, ഓണം സ്പെഷ്യൽ അരിവിതരണം സംസ്ഥാനത്ത് ആരംഭിച്ചു. ഓഗസ്റ്റ് പതിനൊന്ന് മുതലാണ് അരി വിതരണം ആരംഭിച്ചത്. വെള്ള, നീല റേഷൻ കാർഡുടമകൾക്ക് 10.90 രൂപ നിരക്കിൽ അഞ്ചുകിലോ വീതം സ്പെഷ്യൽ പുഴക്കലരിയാണ് വിതരണം ചെയ്യുന്നത്.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
