നിത്യജീവിതത്തില് നാം നേരിടുന്ന പലതരം ആരോഗ്യപ്രശ്നങ്ങളുണ്ട് ഇവയില് മിക്കതും നാം നമ്മുടെ ജീവിതരീതികളില് ക്രമീകരിക്കുന്നതോടെ തന്നെ നമ്മളില് നിന്ന് ഇല്ലാതായിപ്പോകുന്നവയാകാം.അങ്ങനെയൊരു പ്രശ്നത്തെ കുറിച്ചാണിനി വിശദീകരിക്കുന്നത്. പലരും പരാതിപ്പെടാറുള്ളൊരു വിഷയമാണ് വായ്നാറ്റം. വായ ശുചിയായി കൊണ്ടുനടക്കാതിരിക്കുന്നതും, ദഹനപ്രശ്നങ്ങള് പതിവാകുന്നതും, ചിലയിനം ഭക്ഷണങ്ങള് കഴിക്കുന്നതുമെല്ലാം വായ്നാറ്റത്തിന് ഇടയാക്കാറുണ്ട്.
എന്നാല് വായ്നാറ്റം മറ്റൊരു ഗുരുതരമായ രോഗത്തിന്റെ ലക്ഷണം കൂടിയായി മാറാറുണ്ടെന്നാണ് വിദഗ്ധര് ചൂണ്ടിക്കാട്ടുന്നത്. ‘ഫാറ്റി ലിവര്’ അഥവാ കരളിനെ ബാധിക്കുന്ന രോഗത്തിന്റെ സൂചനയായി വായ്നാറ്റമുണ്ടാകാമത്രേ. കരളില് കൊഴുപ്പ് അമിതമായി അടിഞ്ഞുകിടന്ന് ഉണ്ടാകുന്ന രോഗമാണിത്. സ്ഥിരമായി മദ്യപിക്കുന്നവരില് അത് മൂലം ഫാറ്റി ലിവര് ഉണ്ടാകാറുണ്ട്. ഇതിനെ ‘ആല്ക്കഹോളിക് ഫാറ്റി ലിവര്’ എന്നാണ് വിളിക്കാറ്. മദ്യപിക്കാത്തവരിലും കൊളസ്ട്രോള്, പ്രമേഹം, ഉറക്കപ്രശ്നം, തൈറോയ്ഡ് പ്രശ്നം എന്നിങ്ങനെയുള്ള കാരണങ്ങളാല് ക്രമേണ ഫാറ്റി ലിവര് ഉണ്ടാകാറുണ്ട്.
ഫാറ്റി ലിവര് പിടിപെടുമ്പോള് കരളിന് സാധാരണഗതിയില് പ്രവര്ത്തിക്കുന്നത് പോലെ പ്രവര്ത്തിക്കാന് സാധിക്കാതെ വരികയും, ഇത് കൃത്യമായി ചികിത്സിച്ചിട്ടില്ലെങ്കില് ‘ലിവര് സിറോസിസ്’ പോലുള്ള മാരകമായ അസുഖങ്ങളിലേക്ക് എത്തുകയും മരണം വരെ സംഭവിക്കുകയും ചെയ്യാം. അത്രയും ഗുരുതരമായ അവസ്ഥയാണ് ‘ഫാറ്റി ലിവര്’. രോഗി അവശനിലയിലേക്ക് നീങ്ങിത്തുടങ്ങുമ്പോഴാണ് പലപ്പോഴും ലക്ഷണങ്ങള് പ്രകടമാവുക. എന്തായാലും ഫാറ്റി ലിവറുള്ളവരില് പുറമേക്ക് കാണാന് സാധിക്കുന്നൊരു ലക്ഷണമായാണ് വായ്നാറ്റം വരുന്നത്. ചീഞ്ഞ എന്തിന്റെയോ ഗന്ധത്തിന് സമാനമായ ഗന്ധമായിരിക്കും ഇത്തരക്കാരിലുണ്ടാവുക.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.