മലപ്പുറം: ദോഹയിൽ നിന്ന് നെടുമ്പാശ്ശേരി വിമാനത്താവളം വഴി കടത്തിയ ഒരു കിലോയിലധികം സ്വർണം മലപ്പുറം പോലീസ് അരീകോട് വച്ച് പിടികൂടി. സ്വർണം കടത്തിയ യാത്രക്കാരനെയും കടത്തിയ സ്വർണം കൈപ്പറ്റിയ മറ്റ് മൂന്ന് പേരെയും ഇവർ സഞ്ചരിച്ചിരുന്ന കാറും കാരിയറിന് നൽകാനായി കാറിൽ സൂക്ഷിച്ചിരുന്ന ഒരു ലക്ഷം രൂപയും പൊലീസ് കസ്റ്റഡിയിലെടുത്തു.
ദോഹയിൽ നിന്ന് നെടുമ്പാശേരി വിമാനത്താവളത്തിലെത്തിയ കോഴിക്കോട് കൊടിയത്തൂർ സ്വദേശി അഷ്റഫ് (56), സ്വർണം കൈപ്പറ്റിയ കോഴിക്കോട് താമരശ്ശേരി സ്വദേശികളായ മിദ്ലാജ് (23), നിഷാദ് (36), ഫാസിൽ (40) എന്നിവരെയാണ് 1063 ഗ്രാം സ്വർണവുമായി പൊലീസ് പിടികൂടിയത്.
1063 ഗ്രാം സ്വർണം മിശ്രിത രൂപത്തിലാക്കി നാല് ക്യാപ്സ്യൂളുകളിലാക്കി ശരീരത്തിനുള്ളിൽ ഒളിപ്പിച്ചാണ് അഷ്റഫ് കടത്തിയത്. കടത്തിയ സ്വർണം കൈപ്പറ്റി അഷ്റഫിനേയും കുടുംബത്തേയും കാറില് കയറ്റി കൊടുവള്ളിയിലേക്ക് പോകുംവഴിയാണ് ഇവര് പൊലീസ് പിടിയിലായത്. പിടിച്ചെടുത്ത സ്വർണത്തിന് ആഭ്യന്തര വിപണിയിൽ 63 ലക്ഷം രൂപ വിലവരും.
രാവിലെ 06.30ന് ദോഹയിൽ നിന്ന് എത്തിയ എയർ ഇന്ത്യ എക്സ്പ്രസ് വിമാനത്തിൽ (IX 416) നെടുമ്പാശ്ശേരി വിമാനത്താവളത്തിലാണ് ഇയാള് ഇറങ്ങിയത്. കസ്റ്റംസ് പരിശോധനയ്ക്ക് ശേഷം 08.30 ന് വിമാനത്താവളത്തിന് പുറത്തിറങ്ങിയ അഷ്റഫില് നിന്നും കള്ളക്കടത്ത് സ്വര്ണം ഏറ്റുവാങ്ങി കൊടുവള്ളിയിലേക്ക് പോകുന്നുണ്ടെന്നുള്ള രഹസ്യ വിവരം മലപ്പുറം ജില്ലാ പൊലീസ് മേധാവി എസ് സുജിത് ദാസ് ഐപിഎസിന് ലഭിച്ചതിന്റെ അടിസ്ഥാനത്തിലാണ് അരീകോട് പൊലീസ് ഇവരെ കസ്റ്റഡിയിലെടുത്തത്.
ചോദ്യംചെയ്യലില് അഷ്റഫോ കാറിലുള്ളവരോ തങ്ങളുടെ പക്കല് സ്വര്ണമുണ്ടെന്ന കാര്യം നിഷേധിച്ചുകൊണ്ടിരുന്നു. തുടര്ന്ന് ഇയാളുടെ ലഗ്ഗേജ് ബോക്സുകള് ഓപ്പണ് ചെയ്തു വിശദമായി പരിശോധിച്ചിട്ടും സ്വര്ണം കണ്ടെത്താനായില്ല. ശേഷം ഇവര് സഞ്ചരിച്ച കാര് വിശദമായി പരിശോധിക്കുകയായിരുന്നു. വിശദമായ പരിശോധനയിലാണ് കാറിനകത്ത് ഫ്രണ്ട് ലെഗ് റൂമില് പ്രോ ക്ലിപ്പിനകത്ത് അതി വിദഗ്ദമായി ഒളിപ്പിച്ച രീതിയില് 4 കാപ്സ്യൂളുകള് കണ്ടെത്തിയത്. അഷ്റഫിനെ വിശദമായി ചോദ്യംചെയ്ത് വരികയാണ്. സ്വര്ണക്കടത്തിന് പിന്നില് പ്രവര്ത്തിച്ചവരെ കണ്ടെത്താനുള്ള ശ്രമം തുടരുകയാണ്.
പിടിച്ചെടുത്ത സ്വര്ണ്ണവും ഒരു ലക്ഷം രൂപയും വാഹനവും കോടതിയില് സമര്പ്പിക്കും, അതൊടൊപ്പം തുടരന്വേഷണത്തിനായി വിശദമായ റിപ്പോര്ട്ട് കസ്റ്റംസിനും സമര്പ്പിക്കും. കാലിക്കറ്റ് എയര്പോര്ട്ടിന് പുറത്ത് പൊലീസ് പരിശോധന കര്ശനമാക്കിയതിനെ തുടര്ന്ന് നെടുമ്ബാശ്ശേരി എയര്പോര്ട്ടിലേക്കും കണ്ണൂര് എയര്പോര്ട്ടിലേക്കും കള്ളക്കടത്ത് സംഘം ചുവട് മാറ്റിയതായി പൊലീസിന് നേരത്തെ വിവരം ലഭിച്ചിരുന്നു.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.