ആഗോളതലത്തില് തന്നെ വന്ധ്യത വര്ധിച്ചുവരികയാണ്. ഇന്ത്യയിലാണെങ്കില് അഞ്ച് ദമ്പതികളില് ഒരു ജോഡിയെങ്കിലും വന്ധ്യത നേരിടുന്നുവെന്നാണ് പുതിയ കണക്ക്. വന്ധ്യത, നമുക്കറിയാം, സ്ത്രീയിലോ പുരുഷനിലോ ആകാം. എന്നാല് താരതമ്യേന പുരുഷന്മാരിലെ വന്ധ്യതയാണത്രേ കണ്ടെത്താന് കൂടുതല് സമയമെടുക്കാറ്. പാരിസ്ഥിതികമായ ഘടകങ്ങള്, ജീവിതരീതിയുമായി ബന്ധപ്പെട്ട അനാരോഗ്യകരമായ സംഗതികള്, അസുഖങ്ങള് എന്നിവയുടെയെല്ലാം ഭാഗമായി പുരുഷന്മാരില് വന്ധ്യതയുണ്ടാകാം.
വന്ധ്യതയുള്ള പുരുഷന്മാരില് ഇത് മാത്രമായിരിക്കില്ല, മറിച്ച് ആരോഗ്യപരമായി പല പ്രശ്നങ്ങളും കണ്ടേക്കാനുള്ള സാധ്യത കൂടുതലാണെന്നും വിദഗ്ധര് പറയുന്നു. അമിതവണ്ണം, ഉയര്ന്ന കൊളസ്ട്രോള്, ഉയര്ന്ന രക്തസമ്മര്ദ്ദം എന്നിവയെല്ലാം ഇവയില് ചിലതാണ്. ഇത്തരം പ്രശ്നങ്ങളെല്ലാം കൃത്യമായി ചികിത്സയ്ക്ക് വിധേയമാക്കേണ്ടതുണ്ട്.
നേരത്തേ കണ്ടെത്തുകയാണെങ്കില് ഒരു പരിധി വരെ പുരുഷന്മാരിലെ വന്ധ്യതയ്ക്കും ഫലപ്രദമായ പരിഹാരം തേടാവുന്നതാണ്. എന്തായാലും പുരുഷന്മാരുടെ വന്ധ്യതയെ കുറിച്ച് പറയുമ്പോള് നിര്ബന്ധമായും നിങ്ങള് അറിഞ്ഞിരിക്കേണ്ട ചിലത് കൂടിയുണ്ട്. അത്തരത്തിലുള്ള കാര്യങ്ങളാണിനി പങ്കുവയ്ക്കുന്നത്. മറ്റ് പല ആരോഗ്യപ്രശ്നങ്ങള്ക്കും അസുഖങ്ങള്ക്കുമൊപ്പം പുരുഷന്മാരില് വന്ധ്യതയുണ്ടാക്കാനും പുകവലി കാരണമാകാം. ബീജോത്പാദനത്തെയും ബീജത്തിന്റെ ആരോഗ്യത്തെയും ആയുര്ദൈര്ഘ്യത്തെയുമെല്ലാം പുകവലി പ്രതികൂലമായി ബാധിക്കാം. ഗര്ഭധാരണത്തിലിരിക്കുന്ന കുഞ്ഞ് അബോര്ഷനായി പോകുന്നതിനും അച്ഛന്റെ പുകവലി കാരണമായേക്കാം. അത്രമാത്രം ഹാനികരമാണ് ഈ ശീലമെന്ന് മനസിലാക്കുക.
പുകവലി പോലെ തന്നെ പുരുഷന്മാരില് വലിയൊരു വിഭാഗം പേരും കൊണ്ടുനടക്കുന്ന മറ്റൊരു ദുശ്ശീലമാണ് മദ്യപാനം. അമിതമായി മദ്യപിക്കുന്നവരില് ശുക്ലത്തിന്റെ അളവ് കുറഞ്ഞുവരികയും അതുപോലെ തന്നെ ബീജത്തിന്റെ ആയുര്ദൈര്ഘ്യവും ആരോഗ്യവും ക്ഷയിച്ചുവരികയും ചെയ്തേക്കാം.
വ്യായാമമില്ലായ്മ പുരുഷന്മാരിലെ വന്ധ്യതയ്ക്ക് കാരണമാകുന്നതായി പല പഠനങ്ങളും ചൂണ്ടിക്കാണിക്കുന്നുണ്ട്. അതിനാല് മിതമായ രീതിയിലുള്ള വ്യായാമം പുരുഷന്മാര് നിര്ബന്ധമായും ചെയ്യുക. മുപ്പത് മുതല് 45 നിമിഷം വരെയെങ്കിലും ദിവസവും വ്യായാമത്തിന് വേണ്ടി മാറ്റിവയ്ക്കുക. ആഴ്ചയില് അഞ്ച് ദിവസമെങ്കില് ഇത്തരത്തില് പോവുക. ബീജോത്പാദനം കൂടാനും ബീജത്തിന്റെ ഗുണമേന്മ വര്ധിപ്പിക്കാനുമെല്ലാം ഇത് സഹായിക്കും. അമിതവണ്ണവും ഒരു വിഭാഗം പുരുഷന്മാരില് വന്ധ്യതയുണ്ടാക്കുന്നുണ്ട്. എന്നാല് അമിതവണ്ണമുള്ള എല്ലാ പുരുഷന്മാരിലും ഈ പ്രശ്നമുണ്ടാകാമെന്നല്ല. ഒരു വിഭാഗം പേരില് മാത്രം, വണ്ണം വന്ധ്യതയിലേക്ക് നയിക്കാം. ശരീരത്തില് കൊഴുപ്പ് അമിതമാകുമ്പോള് അത് ഹോര്മോണ് വ്യതിയാനങ്ങള്ക്ക് ഇടയാക്കുകയും അങ്ങനെ വന്ധ്യതയിലേക്ക് നയിക്കപ്പെടുകയുമാണ് ചെയ്യുന്നത്. കൂടാതെ വിഷാദവും ഉത്കണ്ഠയും പോലുള്ള മാനസികപ്രശ്നങ്ങളും വന്ധ്യതയിലേക്ക് നയിക്കാം.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
