ജൂലൈ 1 മുതല് നിലവില് വരുന്ന സാമ്പത്തിക മാറ്റങ്ങള് സാധാരണക്കാരുടെ സാമ്പത്തിക ഇടപാടുകളെ സ്വാധീനിക്കുന്ന പ്രധാനപ്പെട്ട കാര്യങ്ങളാണ്.
ആദായനികുതി റിട്ടേണ് സമർപ്പണം മുതല് ബാങ്കിംഗ് നിയമങ്ങള് വരെ നീളുന്ന ഈ മാറ്റങ്ങളെക്കുറിച്ച് കൃത്യമായ ധാരണ ഉണ്ടായിരിക്കുന്നത് അത്യാവശ്യമാണ്.
2025-26 സാമ്പത്തിക വർഷത്തേക്കുള്ള ആദായനികുതി റിട്ടേണ് സമർപ്പിക്കുന്നതിനായി നിശ്ചയിച്ചിട്ടുള്ള അവസാന തീയതി 2026 ജൂലൈ 31 ആണ്. പിഴ ഒഴിവാക്കുന്നതിനായി നികുതിദായകർ ഈ തീയതിക്ക് മുൻപായി തന്നെ റിട്ടേണ് ഫയല് ചെയ്യാൻ ശ്രദ്ധിക്കണം. ഇതിനോടൊപ്പം തന്നെ, ആധാറുമായി ബന്ധപ്പെട്ട ഇമെയില് വിലാസം മാറ്റുന്നതിനായി യുഐഡിഎഐ പുതിയ സൗകര്യം ഏർപ്പെടുത്തിയിട്ടുണ്ട്. ജൂലൈ 1 മുതല് ഡിസംബർ 31 വരെ മൊബൈല് ആപ്പ് വഴി ഇമെയില് അപ്ഡേറ്റ് ചെയ്യുന്നത് തികച്ചും സൗജന്യമായിരിക്കും. ഇതിനായി നേരത്തെ നല്കിയിരുന്ന 75 രൂപയുടെ ഫീസ് ഈ ആറ് മാസത്തേക്ക് ഒഴിവാക്കിയിട്ടുണ്ട്.
ക്രെഡിറ്റ് കാർഡ് ഉപയോഗിക്കുന്നവർക്ക് വരാനിരിക്കുന്ന മാറ്റങ്ങള് ശ്രദ്ധേയമാണ്. എസ്ബിഐ ക്രെഡിറ്റ് കാർഡുകളുടെ റിവാർഡ് പോയിന്റ് ഘടനയില് മാറ്റം വരുത്തിയിട്ടുണ്ട്. റിവാർഡ് പോയിന്റുകള്ക്ക് പരിധി നിശ്ചയിക്കുന്നതിനൊപ്പം, ആനുകൂല്യങ്ങള് ലഭിക്കാത്ത ഇടപാടുകളുടെ എണ്ണത്തിലും വർദ്ധനവുണ്ട്. എച്ച്ഡിഎഫ്സി ബാങ്കിന്റെ എയർപോർട്ട് ലോഞ്ച് ആക്സസ് ആനുകൂല്യങ്ങളിലും കർശനമായ നിയന്ത്രണങ്ങള് വരുന്നുണ്ട്. മുൻ സാമ്പത്തിക പാദത്തില് കുറഞ്ഞത് 60,000 രൂപയുടെ ഇടപാട് നടത്തുന്നവർക്ക് മാത്രമേ ഇനി ഒരു ക്വാർട്ടറില് മൂന്ന് സൗജന്യ ലോഞ്ച് സന്ദർശനങ്ങള് ലഭിക്കൂ.
ഇതോടൊപ്പം പാസ്പോർട്ട് സേവനങ്ങളുടെ ഫീസിലും വർദ്ധനവുണ്ടാകും. ഇന്ത്യയിലും വിദേശത്തുമായി ലഭിക്കുന്ന സാധാരണ, തത്കാല് പാസ്പോർട്ട് സേവനങ്ങള്ക്കായി പുതിയ നിരക്കുകള് വിദേശകാര്യ മന്ത്രാലയം നടപ്പിലാക്കുന്നുണ്ട്. ഉപഭോക്താക്കളെ ചൂഷണത്തില് നിന്ന് സംരക്ഷിക്കുന്നതിനായി റിസർവ് ബാങ്ക് പുറത്തിറക്കിയ പുതിയ ചട്ടങ്ങളും ജൂലൈ 1 മുതല് പ്രാബല്യത്തില് വരും. തെറ്റായ വിവരങ്ങള് നല്കി സാമ്പത്തിക ഉല്പ്പന്നങ്ങള് വില്ക്കുന്നത് ബാങ്കുകള്ക്ക് ഇനി എളുപ്പമായിരിക്കില്ല. ഇത്തരം സാഹചര്യങ്ങളില് ഉപഭോക്താക്കള്ക്ക് അടച്ച തുക പൂർണ്ണമായും തിരികെ ലഭിക്കാനും, സംഭവിച്ച നഷ്ടത്തിന് നഷ്ടപരിഹാരം നേടാനും ഈ നിയമങ്ങള് വഴി അർഹതയുണ്ടായിരിക്കും
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
