കോഴിക്കോട്: നാല് പതിറ്റാണ്ടോളം ഹാസ്യത്തിന്റെ വേറിട്ട ശൈലി കൊണ്ട് മലയാള സിനിമയിൽ നിറഞ്ഞു നിന്ന നടൻ മാമുക്കോയ (76) അന്തരിച്ചു. കോഴിക്കോട്ടെ സ്വകാര്യ ആശുപത്രിയിലായിരുന്നു അന്ത്യം. ഹൃദയാഘാതത്തോടൊപ്പം മസ്തിഷ്ക രക്തസ്രാവവുമാണ് മരണകാരണം.
കാളികാവ് പൂങ്ങോട് സെവൻസ് ഫുട്ബോൾ ടൂർണമെന്റിന്റെ ഉദ്ഘാടനത്തിനെത്തിയ മാമുക്കോയയെ ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് വണ്ടൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. തുടർന്ന് കോഴിക്കോട്ടെ സ്വകാര്യ ആശുപത്രിയിലേക്ക് മാറ്റി. തിങ്കളാഴ്ച മുതൽ തീവ്രപരിചരണ വിഭാഗത്തിൽ ചികിത്സയിലായിരുന്നു. ബുധനാഴ്ച ഉച്ചയ്ക്ക് ഒന്നേ അഞ്ചോടെയായിരുന്നു അന്ത്യം.
മലയാള സിനിമയിലെ ഏറ്റവും മികച്ച ഹാസ്യ നടന്മാരിൽ ഒരാളായ മാമുക്കോയ നാടകരംഗത്ത് നിന്നാണ് വന്നത്. കോഴിക്കോടൻ ഭാഷയുടെ മനോഹര ശൈലിയെ സിനിമയിൽ ജനകീയമാക്കിയ നടൻ കൂടിയാണ് മാമുക്കോയ. കുതിരവട്ടം പപ്പു മുമ്പ് അവതരിപ്പിച്ചതിൽ നിന്ന് വ്യത്യസ്തമായി മുസ്ലീം സംഭാഷണ ശൈലിയുടെ സവിശേഷതയായി മാമുക്കോയ മാറി. വിദ്യാർത്ഥിയായിരിക്കുമ്പോൾ തന്നെ നാടക പ്രവർത്തനങ്ങളിൽ സജീവമായിരുന്നു.
അറബിക്കടലും കല്ലായിപ്പുഴയും സംഗമിക്കുന്ന കോഴിക്കോടിന്റെ തീരദേശ ഗ്രാമമാണ് പള്ളിക്കണ്ടി. അവിടെയാണ് മാമുക്കോയ ജനിച്ചതും വളർന്നതും. പള്ളിക്കണ്ടിയിൽ ചാലിക്കണ്ടിയിൽ മുഹമ്മദിന്റെയും ഇമ്പിച്ചി ആയിഷയുടെയും മകനായി 1946-ൽ ജനിച്ചു. ചെറുപ്പത്തിലേ മാതാപിതാക്കൾ മരിച്ചതിനാൽ ജ്യേഷ്ഠന്റെ സംരക്ഷണയിലാണ് അദ്ദേഹം വളർന്നത്. കോഴിക്കോട് എം. എം. ഹൈസ്കൂളില് പത്താംക്ലാസ് വരെയുള്ള പഠനം പൂര്ത്തിയാക്കിയത്. പഠനകാലത്തു തന്നെ സ്കൂളില് നാടകങ്ങള്ക്ക് നേതൃത്വം നല്കുകയുംഅഭിനയിക്കുകയും ചെയ്യുമായിരുന്നു.
സ്കൂൾ വിദ്യാഭ്യാസത്തിനു ശേഷം കോഴിക്കോട് ജില്ലയിലെ കല്ലായിയിൽ മരം അളക്കുന്ന ജോലിയിൽ പ്രവേശിച്ചു. മരം നമ്പറിംഗ്, ഗുണനിലവാര പരിശോധന, അളക്കൽ എന്നിവയിൽ വിദഗ്ധനായി. നാടകം ഒരുമിച്ച് കൊണ്ടുവരാനും അദ്ദേഹം ശ്രദ്ധിച്ചു. മലബാർ മേഖലയിലെ നിരവധി നാടക-സിനിമാ പ്രവർത്തകരുമായി അദ്ദേഹം സൗഹൃദത്തിലായിരുന്നു. കെ.ടി. മുഹമ്മദ്, വാസു പ്രദീപ്, ബി. മുഹമ്മദ് (കവിമാഷ്), എ. കെ. പുതിയങ്ങാടി, കെ. ടി. കുഞ്ഞ്, ചെമ്മങ്ങാട് റഹ്മാന് തുടങ്ങിയവരുടെ നാടകങ്ങളില് ശ്രദ്ധേയമായ വേഷങ്ങള് ചെയ്തു.
സുഹൃത്തുക്കളെല്ലാവരും ചേര്ന്ന് ഒരു നാടകം സിനിമയാക്കിയതാണ് ചലച്ചിത്ര രംഗത്തേക്കുള്ള വഴി തുറന്നത്. നിലമ്പൂര് ബാലൻ സംവിധായകനായ ‘അന്യരുടെ ഭൂമി’ (1979) എന്ന ബ്ലാക്ക് ആന്ഡ് വൈറ്റ് ചിത്രത്തിലൂടെയായിരുന്നു അരങ്ങേറ്റം. 1982-ല് എസ്. കൊന്നനാട്ട് സംവിധാനം ചെയ്ത സുറുമയിട്ട കണ്ണുകള് എന്ന ചിത്രത്തില് വൈക്കം മുഹമ്മദ് ബഷീറിന്റെ ശുപാര്ശയില് ഒരു വേഷം ലഭിച്ചു. മമ്മൂട്ടിയെ നായകനാക്കി സാജന് സംവിധാനം ചെയ്ത സ്നേഹമുള്ള സിംഹമായിരുന്നു മൂന്നാമത്തെ ചിത്രം. വളരെ സ്വഭാവികമായ അഭിനയ ശൈലിയിലൂടെ സിനിമയില് തന്റേതായ ഇടം നേടിയെടുക്കുകയായിരുന്നു മാമുക്കോയ. പിന്നീട് സത്യന് അന്തിക്കാടിന്റെ ഗാന്ധിനഗര്, സെക്കന്റ് സ്ട്രീറ്റ്, സന്മനസ്സുള്ളവര്ക്ക് സമാധാനം തുടങ്ങിയ ചിത്രങ്ങളിലൂടെ തിരക്കേറിയ നടനായി മാറി. ദൂരെ ദൂരെ ഒരു കൂടു കൂട്ടാം എന്ന ചിത്രത്തിലെ അറബി മുന്ഷിയുടെ വേഷം വളരെയേറെ ശ്രദ്ധിക്കപ്പെട്ടു.
സത്യന് അന്തിക്കാട്, പ്രിയദര്ശന് എന്നിവരുടെ സിനിമകളിലെ സ്ഥിരം സാന്നിധ്യമായിരുന്നു. നാടോടിക്കാറ്റിലെ തട്ടിപ്പുകാരന് ഗഫൂര്ക്ക, സന്ദേശത്തിലെ കെ. ജി. പൊതുവാള്, ചന്ദ്രലേഖയിലെ പലിശക്കാരന്, വെട്ടത്തിലെ ഹംസക്കോയ/ രാമന് കര്ത്താ, മഴവില്ക്കാവടിയിലെ കുഞ്ഞിഖാദര്, രാംജിറാവു സ്പീക്കിംഗിലെ ഹംസക്കോയ, വരവേല്പ്പിലെ ഹംസ, പ്രാദേശിക വാര്ത്തകളിലെ ജബ്ബാര്, കണ്കെട്ടിലെ ഗുണ്ട കീലേരി അച്ചു, ഡോക്ടര് പശുപതിയിലെ വേലായുധന് കുട്ടി, തലയണമന്ത്രത്തിലെ കുഞ്ഞനന്ദന് മേസ്തിരി, നരേന്ദ്രന് മകന് ജയകാന്തനിലെ സമ്പീശന്, കളിക്കളത്തിലെ പോലീസുകാരന്, ഹിസ് ഹൈനസ് അബ്ദുള്ളയില് ജമാല്, കൗതുക വാര്ത്തകളിലെ അഹമ്മദ് കുട്ടി, മേഘത്തിലെ കുറുപ്പ്, പട്ടാളത്തിലെ ഹംസ, മനസ്സിനക്കരയിലെ ബ്രോക്കര്, പെരുമഴക്കാലത്തിലെ അബ്ദു, ബ്യാരി എന്ന ചിത്രത്തിലെ കഥാപാത്രം, ഉസ്ദാത് ഹോട്ടലിലെ ഉമ്മര്, കെ.എല് 10 പത്തിലെ ഹംസകുട്ടി, ആട് 2 ലെ ഇരുമ്പ് അബ്ദുള്ള, മരയ്ക്കാര് അറബിക്കടലിലെ സിംഹത്തിലെ അബൂബക്കര് ഹാജി, കുരുതിയിലെ മൂസാ ഖാലിദ്, മിന്നല് മുരളിയിലെ ഡോക്ടര് നാരായണന് തുടങ്ങിയവയെല്ലാം ശ്രദ്ധേയകഥാപാത്രങ്ങളാണ്. 2001 ല് സുനില് സംവിധാനം ചെയ്ത കോരപ്പന് ദ ഗ്രേറ്റ്, ഇ.എം അഷ്റഫിന്റെ സംവിധാനത്തില് 2023 ല് പുറത്തിറങ്ങിയ ഉരു എന്നീ ചിത്രങ്ങളില് നായകനായി. മലയാളത്തിന് പുറമേ തമിഴ് ചിത്രങ്ങളിലും മാമുക്കോയ അഭിനയിച്ചിട്ടുണ്ട്. അരങ്ങേട്ര വേലൈ, കാസ്, കോബ്ര തുടങ്ങിയവയാണ് തമിഴ്ചിത്രങ്ങള്.
പെരുമഴക്കാലത്തിലെ അബ്ദു എന്ന കഥാപാത്രത്തിന് 2004 ല് കേരള സംസ്ഥാന ചലച്ചിത്ര പുരസ്കാരത്തില് പ്രത്യക ജൂറി പരാമര്ശം ലഭിച്ചു, ഇന്നത്തെ ചിന്താവിഷയത്തിലെ അഭിനയത്തിന് 2008 ല് മികച്ച ഹാസ്യനടനായി തിരഞ്ഞെടുക്കപ്പെട്ടു.
ഷൂട്ടിങ് ലൊക്കേഷനില് വെച്ച് നെഞ്ച് വേദന വന്നതിനെത്തുടര്ന്ന് അദ്ദേഹത്തെ ആന്ജിയോപ്ളാസ്റ്റിക്ക് വിധേയനാക്കിയിട്ടുണ്ട്. രണ്ട് സ്റ്റെന്റും ഇട്ടു. ഒരു ബ്ലോക്ക് കൂടിയുണ്ടായിരുന്നതിനാല് ബൈപ്പാസ് ചെയ്യണമെന്നും ഡോക്ടര്മാര് നിര്ദ്ദേശിച്ചു. ‘കുരുതി’യിലെ മൂസാ ഖാലിദായി തിരശ്ശീലയില് തിളങ്ങിനിന്ന സമയത്താണ് മാമുക്കോയ അര്ബുദത്തെ നേരിടുന്നത്. 33 റേഡിയേഷന്, ആറു കീമോതെറാപ്പിക്കും വിധേയനായി. തൊണ്ടയിലായിരുന്നു കാന്സര് ബാധിച്ചത്. എല്ലാം വരുന്നിടത്തുവെച്ചുകാണാം എന്ന രീതിയാണ് മാമുക്കോയ ജീവിതത്തില് സ്വീകരിച്ച് പോന്നത്. ജീവിതത്തില് നമുക്ക് അസുഖം വരുമെന്നും അപ്പോള് നിലവിളിച്ചിട്ട് കാര്യമില്ലെന്നും പറഞ്ഞിട്ടുള്ള മാമുക്കോയ പ്രതിസന്ധികളെ അതിജീവിക്കണമെന്നും മാനസികാവസ്ഥയാണ് പ്രധാനമെന്നും അടിയുറച്ച് വിശ്വസിച്ചു. അഷ്റഫ് ഹംസ സംവിധാനം ചെയ്ത സുലൈഖ മന്സിലാണ് ഏറ്റവും ഒടുവില് അഭിനയിച്ച ചിത്രങ്ങളിലൊന്ന്. ഈ സിനിമ തിയേറ്ററുകളില് പ്രദര്ശനം തുടരവേയാണ് മാമുക്കോയയുടെ അപ്രതീക്ഷിത വിയോഗം. സുഹ്റയാണ് മാമുക്കോയയുടെ ഭാര്യ. നിസാര്, ഷാഹിദ, നാദിയ, അബ്ദുള് റഷീദ് എന്നിവര് മക്കളാണ്.
പ്രസ്സ്ലൈവ് ഓൺലൈൻ വാർത്തകൾ വാട്സ്ആപ് ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പിൽ അംഗമാകാൻ ഈ ലിങ്കിൽ ക്ലിക്ക് ചെയ്യുക.
